Fabos Fali Abantu batanu bo muri Repubulika Iharanira Demokarasi ya Congo barimo umupolisi biciwe mu mujyi wa Goma no mu nkengero zawo hagati ya tariki ya 9 n’iya 11 Ugushyingo 2024.
Radio Okapi yatangaje ko tariki ya 9 Ugushyingo uyu mupolisi yishwe arashwe n’abajura bitwaje intwaro ubwo yari mu nkambi y’impunzi ya Rusayo, inzu 17 impunzi zibamo zirasenywa, zamburwa ibyo zari zifite birimo amafaranga.
Ku munsi wakurikiyeho, abantu babiri barimo uwo mu gace ka Kiziba 2 na Bugamba, muri gurupoma ya Muja muri teritwari ya Nyiragongo na bo bishwe barashwe n’abajura bitwaje intwaro.
Kuri uyu wa 11 Ugushyingo, mu gace ka Ndosho hiciwe undi muntu nyuma yo kwamburwa n’amabandi yitwaje intwaro igikapu n’ibindi yari afite, undi yicirwa mu gace ka Kabaya muri gurupoma ya Munigi, aziritse amaboko.
Meya w’umujyi wa Goma, Komiseri Kapend Kamand, aherutse kubwira abanyamakuru ko kuva inzego z’umutekano zatangira ibikorwa byiswe ‘Safisha Mji’, abantu 450 bakekwaho ubujura batawe muri yombi, bafatanwa intwaro 350.
Uyu muyobozi usanzwe ari n’umupolisi yasobanuye ko mu batawe muri yombi harimo abasirikare, abatorotse igisirikare, abasezerrewe mu gisirikare, abapolisi, abo mu mitwe ya Wazalendo, abo mu mashyaka na ba rushimusi, kandi ko bafungiwe muri gereza ya Munzenze iri Goma.
Nubwo ibi bikorwa byatangiye muri Mutarama 2024 bikomeje, ibyaha mu mujyi wa Goma no mu nkengero bikomeje gufata intera, aho mu mezi atatu ashize byikubye kabiri ugereranyije n’igipimo gisanzwe.
Fabos Fali 