Fabos Fali 
Umuvugizi w’Umutwe wa M23 mu rwego rwa gisirikare, Lt Col Willy Ngoma, yagaragaje ko Repubulika Iharanira Demokarasi ya Congo ari igihugu gikize, ariko bikaba bibabaje kuba umusirikare w’iki gihugu ahembwa atageze ku 100$, mu gihe abacanshuro Perezida Félix Antoine Tshisekedi yahaye akazi bahembwa 8000$.
Ni ingingo yagarutse kuri uyu wa 29 Mutarama 2025, mu kiganiro kigufi yagiranye n’uwayoboraga abacanshuro b’Abanya-Burayi bamaze iminsi bahangana na M23 mu Burasirazuba bwa RDC.
Kuri uyu wa Gatatu, nibwo aba bacanshuro 280 biganjemo abakomoka muri Romania, boherejwe iwabo banyuze mu Rwanda, nyuma yo kwambukira mu Karere ka Rubavu, bava i Goma, aho batsindiwe urugamba.
Mbere yo gushyikirizwa uruhande rw’u Rwanda, Lt Col Willy Ngoma yagaragaye aganira n’umwe mu babayoboraga, mu mvugo wabonaga ko yarakaye.
Yabwiye uyu mucanshuro ko M23 irwanira ahazaza h’abana b’Abanye-Congo.
Ati “Turwanira ahazaza h’abana bacu, dufite igihugu gikize ariko gifite abayobozi b’ibicucu. Buri kwezi muhembwa 8000$, ariko umusirikare wa Congo abona munsi ya 100$. Ntimukadukinishe, turashaka ko Congo iba igihugu gifite agaciro, ntimukazane imikino yanyu hano, ntimuzigere mwongera kuzana imikino yanyu hano muri Congo, wumvise? Ntimuzongere kugarura iyo mikino yanyu hano. Turwanira ahazaza hacu.”
Nyuma yo kubona ko uyu mucanshuro atari kumva neza ibyo Lt Col Willy Ngoma amubwira, yamutegetse kwicara hasi, asobekeranyije amaguru, amaboko akayashyira ku mutwe. Undi nawe yahise abikora, ariko nyuma y’akanya gato, Willy Ngoma yongera kumuhagurutsa.
Kuva M23 yafata Umujyi wa Goma, benshi mu basirikare ba leta bari muri uyu mujyi bamanitse amaboko, abandi bahungira mu Rwanda. Aba bacanshuro bo bishyikirije MONUSCO, ibambura intwaro.
Biteganyijwe ko ku Kibuga cy’Indege Mpuzamahanga cya Kigali, ari ho bafatira indege ibasubiza iwabo.
Fabos Fali 
