Nyarwaya Innocent wamaze kumenyekana k’umuyoboro wa Youtube nka YAGO wari usanzwe ufite Youtube channel yitwa YAGO TV SHOW ubu we n’abakunzi be bari mu gahinda gakomeye cyane nyuma y’uko uyu muyoboro we YouTube yamaze gufata umwanzuro wo kuwufunga burundu ndetse ikaba yabishyize no mu bikorwa.

Ni kuri uyu wa gatatu tariki 05 z’ukwezi kwa 01 ubwo video zose zose zari zarakozwe n’uyu munyamakuru Yago zasibwe, ariko mbere yaho gato y’uko bazisiba Yago akaba yari yarigeze amara icyumweru cyose adakora video ngo ashyire kuri channel ye abantu batazi impamvu, nyuma y’icyumweru agaruka nk’ibisanzwe, gusa ntibyaramba kuko hashize indi minsi mikeya cyane nibwo Yago yongeye guhagarara gushyiraho video ubundi agahinda yandika k’urukuta rwe rwa TWITTER ndetse na INSTAGRAM amagambo agaragaza ko burya hari abantu bihishe inyuma yo kuba atari gukora akazi ke, aho yanditse agira ati

YAGO: ubushize byarabaye ndaceceka ariko aho bigeze reka mumenye ukuri, kuva uyu munsi kugeza igihe ntazi YAGO TV SHOW ibaye ivuyeho kubera umuntu urimo kutwifuriza kudakomeza kano kazi kacu munyungu ze bwite, kugeza nanubu tutaramenya, abakunzi bacu mwihangane! Uwabikoze Imana imuhe umugisha.

si ibyo gusa kuko nyuma yo kwandika gutyo hasi yarengejeho amagambo avuga ati” Imana yo ntikora nk’abantu kandi ukuri kuzatsinda ikinyoma uko byagenda kose! wowe urimo gukora ibi ntakindi nakwifuriza uretse guhinduka ukareka UMUTIMA MUBI ndetse n’ISHYARI. Abakunzi ba YAGO TV SHOW mukomeze kwihangana.

Nyuma yo kwandika ibi ngibi nibwo noneho amakuru yatangiye gucicikana ku mbuga nkoranyambaga avuga ko YAGO bashobora kuba bamugiriye ishyamba, abandi bati “ni amashyari” ibyo byose bikaba nyuma y’uko YAGO yari atangiye kugira umubare munini cyane w’abamukurikira (views) kuri YouTube channel ye, bityo ngo bakaba bamukoreye ibi kugira ngo adakomeza kumutwara abakiriya.

Mbere y’uko channel ya YAGO ifungwa abantu benshi cyane bagiye bakora ibiganiro ku yandi ma channel bavuga ku kibazo cya YAGO, ariko hari ikiganiro kimwe umunyamakuru w’IMIRASIRE TV yakurikiye kuri channel yitwa IRIS TV aho haje umusore uvuga ko ari umuhanga cyane mu bijyanye na YouTube akavuga ko impamvu nyamukuru channel ya YAGO yabaye ihagaritswe mu gihe kingana n’amezi atatu atabasha gushyiraho video, byose ngo ni ukubera ko abatumirwa YAGO akunda gukoresha ibiganiro bakunda kuza batukana mbese basebanya, muri abo batumirwa hakaba harimo DJ BRIANNE ndetse n’abandi, ibyo bikaba aribyo byatumye ngo bamufungira kugira ngo abanze agabanye amarere.

Uretse ibyo ariko hari n’abandi bantu bashyizwe mu majwi ko aribo batumye channel ya YAGO ifungwa aho abashyize mu majwi harimo ROCKY KIRABIRANYA, FATAKUMAVUTA, SABIN WA ISIMBI TV ndetse na nyiri channel yitwa 3D TV RWANDA, ariko ibi byose bikaba ari ibiri gucicikana ku mbuga nkoranyambaga cyane cyane YouTube ariko ukaba utapfa kumenya nyirizina ngo ni nde wihishe inyuma y’ibi byose cyane ko na nyiri ubwite YAGO ataratobora ngo avuge ngo ni nde waba ubiri inyuma.

Nyuma y’ibyo byose rero byaje kurangira igihe cy’amezi atatu bavugaga ko channel ya YAGO izamaera itajyaho video kivuguruwe ahubwo YouTube ubwayo ifata umwanzuro wo gusiba channel ya YAGO burundu k’uburyo ubu ngubu nta na video nimwe ushobora gusangaho. iyi yabaye inkuru ibabaje cyane ndetse yakuye umutima abakunzi ba YAGO noneho n’umutima umenetse YAGO ubwe ahita yongera kwandika kuri TWITTER ye ndetse na INSTAGRAM avuga,

YAGO: (I’m very disappointed in people) abantu barantengushye cyane, muri make ntawo kwizera uhari. Imana ihora ihoze. ndabamenyesha ko ubu channel ya YAGO TV SHOW yamaze gusibwa ariko hari itsinda ry’abantu bamaze kubyinjiramo nizeye ntashidikanya ko hari icyo bari budufashe! Mukomeze kwihangana.

Aya akaba ariyo makuru ahari agezweho kuri iki kibazo cya YAGO ndetse tukazajya tubagezaho ibizakurikiraho, ariko uko bigaragara wa mugani uko inzira zagenze zose kugira ngo bibe bigeze aha nababwira ko amashyari atari ikintu cyiza, kubera ko kugira ngo YouTube isibe video cyangwa channel byanga byakunda biba byakozwe n’umuntu utifuza ko iyo channel igumaho.

Murakoze!