Fabos Fali 
Ubuyobozi bw’Ingabo za Repubulika Iharanira Demokarasi ya Congo bwatangaje ko Colonel Alexis Rugabisha wari umuyobozi wa brigade ya 12 muri FARDC, yaguye mu mirwano na M23 muri Kivu y’Amajyepfo.
Col. Rugabisha yarasiwe mu mirwano yabereye i Mukwija muri teritwari ya Kalehe mu Ntara ya Kivu y’Amajyepfo ku wa 1 Gashyantare 2025.
Itangazo ryasohowe n’Umuvugizi w’igisirikare cya FARDC, Gén. Maj. Sylvain Ekenge, ku wa 2 Gashyantare 2025, rivuga ko “urupfu rwa Col. Rugabisha ni igihombo gikomeye ku ngabo no ku gihugu.”
Urupfu rw’uyu mugabo rukurikiye urwa Pacifique Ntawunguka (Omega) wari Umuyobozi w’ishami rya gisirikare rya FDLR rizwi nka FOCA (Les Forces Combattantes Abacunguzi) wanarwanaga mu ngabo za FARDC kuri uru rugamba.
Nyuma yo gutakaza abasirikare benshi ku rugamba, FARDC yambuwe Umujyi wa Goma ku wa 26 Mutarama 2025, n’ibindi bice byo muri Kivu y’Amajyaruguru.
Imirwano yakomereje muri Kivu y’Amajyepfo, ndetse Loni iherutse gutangaza ko M23 isatira Umujyi wa Bukavu ngo iwigarurire.
Ubuyobozi bwa M23 bwatangaje ko buzakomeza urugamba kugeza bufashe na Kinshasa. Ni mu gihe Guverinoma ya Congo na yo yahize ko izisubiza ibice byose uyu mutwe wigaruriye.
Fabos Fali 
