Fabrice Nahimana 
FC Barcelona yegukanye igikombe cya 32 cya Copa del Rey nyuma yo gutsinda mukeba wayo Real Madrid ibitego 3-2 ku mukino wa nyuma.
Uyu mukino wabaye mu ijoro ryo ku wa Gatandatu tariki ya 26 Mata 2025, kuri Estadio de la Cartuja mu Mujyi wa Sevilla muri Espagne.
Muri uyu mukino, amakipe yombi nta mbaraga yatangiranye usibye FC Barcelone yatindanaga umupira hagati mu kibuga, ndetse mu minota 20 ya mbere yari yamaze gutera amashoti atatu ku izamu adakanganye ndetse na koruneri ebyiri.
Ku munota wa 27 w’umukino, FC Barcelona yabonye igitego cya mbere muri uyu mukino cyavuye mu gukinana neza kwa Lamine Yamal wahereje umupira mwiza Pedri wari inyuma y’urubuga rw’amahina agahita awohereza mu rushundura.
Igice cya mbere cyarangiye FC Barcelona iyoboye umukino n’igitego 1-0.
Mu igice cya kabiri, Carlo Ancelotti utoza Real Madrid ahita akuramo Ferland Mendy na Rodrygo ashyiramo Fran García na Kylian Mbappé bari babanje hanze.
Mbappé yongeyemo imbaraga zigaragara kuko noneho Real Madrid yatangiye gusatira cyane no gutera amashoti menshi mu izamu rya FC Barcelona, bigahesha akazi umunyezamu wayo Wojciech Szczęsny.
Ku munota wa 69, Real Madrid yabonye igitego cyo kwishyura gitsinzwe na Mbappé wateye coup-franc yavuye ku ikosa ryamukorewe ihita ijya mu izamu.
Ni igitego cyongereye imbaraga abakinnyi ba Real Madrid ndetse babona n’icya kabiri cyatsinzwe na Aurelien Tchouamenie ku munota wa 76, ariko ibyishimo ntibyamara kabiri kuko Ferran Torres yahise acyishyura ku munota wa 84.
Iminota 90 y’umukino yarangiye amakipe yombi anganyije ibitego 2-2. Hitabazwa iminota 30 y’inyongera.
Ku munota wa 115’ Jules Koundé yatsindiye FC Barcelona igitego cya gatatu ku mupira wa wananiwe gufatwa na Ibrahim Diaz atera ishoti rikomeye umupira ujya mu rushundura.
Umukino warangiye FC Barcelona itsinze Real Madrid ibitego 3-2, yegukana igikombe cya 32 cya Copa del Rey mu mateka yayo.
Iki n’igikombe cya kabiri Hansi Flick ahesheje FC Barcelona kuva yayigeramo muri Gicurasi 2024.
Icya mbere cyari Supercopa de España yatwaye muri Mutarama 2025 anyangiye Real Madrid ibitego 5-2 ku mukino wa nyuma.
Uyu wabaye umukino wa kane wikurikiranya FC Barcelone itsinze Real Madrid nyuma y’uheruka wa Supercopa de España yayinyagiye 5-2, uwa Shampiyona yayinyagiyemo 4-0, ndetse n’uwa gicuti wabonetsemo ibitego 2-1.
