Amakuru yamenyekanye kugeza ubu agaragaza ko uwo munyeshuri witwaga Sheilla Ankunda yaba yarafatiwe ibihano nyuma yo gusanganwa ibaruwa bivugwa ko yari yandikiwe cyangwa yandikiye umusore bakundanaga.

Nk’uko amakuru aturuka aho byabereye abivuga, umwarimu utaratangazwa amazina ngo yamukubise inkoni, anamumenyesha ko agomba kuzitaba akanama gashinzwe imyitwarire y’abanyeshuri kugira ngo gasuzume imyitwarire ye.

Nyuma y’icyo gihano, amakuru avuga ko Sheilla Ankunda yasubiye mu icumbi ry’abakobwa (dormitory), aho nyuma baje kumusanga yapfuye. Harakekwa ko yaba yiyahuye yimanitse mu mugozi.

Icyakora, kugeza ubu nta rwego rwa leta cyangwa rwa polisi ruratangaza ku mugaragaro icyateye uru rupfu cyangwa ngo rwemeze amakuru ari kuvugwa.

Ubwo bamwe mu banyamakuru bageragezaga kuvugisha ubuyobozi bw’iri shuri kugira ngo bugire icyo butangaza, umuyobozi waryo, Padiri Charles Niwagaba, yavuze ko batari mu mwanya wo kugira icyo batangaza kuko bari bahanganye n’ibibazo byinshi bikomeye bijyanye n’icyabaye. Yagize ati: “Muduhe umwanya rwose, turi guhangana n’ibintu byinshi muri iki gihe.” Yahise akupa telefoni.

Mu gihe iyi nkuru yandikwaga, Polisi ikorera mu gace ka Greater Bushenyi ntiyari yagashyira ahagaragara itangazo risobanura iby’uru rupfu cyangwa ngo itangaze niba hari iperereza ryatangiye.

Urupfu rw’uyu munyeshuri rwateje agahinda n’impaka ku mbuga nkoranyambaga, aho abantu benshi basaba ko hakorwa iperereza ryigenga kugira ngo hamenyekane ukuri ku byabaye, hanarebwe niba hari amategeko cyangwa amabwiriza y’ishuri yaba yararenzweho.

Abashinzwe uburezi n’uburenganzira bw’abana bakomeje kwibutsa amashuri akamaro ko gukoresha uburyo bwubaka mu gukemura ibibazo by’imyitwarire y’abanyeshuri, birinda ibihano bishobora kugira ingaruka zikomeye ku buzima bwo mu mutwe bwabo.

Mu gihe iperereza rikomeje, haracyategerejwe itangazo rya Polisi n’ibizava mu iperereza kugira ngo hamenyekane neza icyabaye n’icyaba cyaragize uruhare muri uru rupfu.

The post Umwalimu yakubise umunyeshuri ahita yiyahura appeared first on IMIRASIRE TV.