Ignace DUKUZIMANA Tariki 13 Nyakanga 2025 yabaye umunsi w’amateka kuri Chelsea FC, nyuma yo kwegukana igikombe cy’Isi cy’Amakipe (FIFA Club World Cup 2025), itsinze Paris Saint-Germain ibitego 3-0 mu mukino wa nyuma wabereye muri Leta zunze Ubumwe za Amerika. Ni ibitego bibiri byatsinzwe na Cole Palmer ndetse n’icya João Pedro byafashije iyi kipe yo mu Bwongereza kwiyandikisha ku rutonde rw’amakipe yegukanye iri rushanwa inshuro zirenze imwe.
Cole Palmer, wari wanakoze amateka mu myitozo yambaye inkweto zakozwe byihariye ziriho itariki n’aho umukino wa nyuma wabereye, yagaragaje ko atari inkweto gusa zari zidasanzwe, ahubwo n’ibirenge bye byari bihagaze neza. Mu gice cya mbere, yahise atsinda igitego cya mbere ku munota wa 22, icya kabiri ku munota wa 30 akurikirwa n’icya João Pedro ku munota wa 43 ar’icyo cya nyuma, cyahaye Chelsea intsinzi idasubirwaho.
Iri rushanwa ryatangijwe na FIFA mu 2000 rifite intego yo guhuza amakipe yabaye aya mbere iwayo ku migabane yose, ryongeye gusubukurwa mu buryo buhoraho kuva mu 2005. Chelsea, ikipe yamenyekanye cyane mu Bwongereza no ku Isi hose, yari yararyegukanye bwa mbere mu 2021 ubwo yatsindaga Palmeiras yo muri Brazil igitego 1-0.
Kuri iyi nshuro ya kabiri, Chelsea yongeye kugaragaza ubukana n’ubuhanga bwo guhangana ku rwego mpuzamahanga. Abatoza n’abakinnyi b’iyi kipe batangaje ko intego yari imwe gusa: kwegukana igikombe. “Iki ni igihembo cyitiriwe ubwitange, ubufatanye n’ubuhanga,” nk’uko byatangajwe na kapiteni w’iyi kipe, Reece James.
Mu mateka y’iri rushanwa, Real Madrid yo muri Espagne ni yo iyoboye ku bw’intsinzi nyinshi, kuko yaryegukanye inshuro eshanu (mu 2014, 2016, 2017, 2018 na 2022) , ikurikirwa na FC Barcelona yaryegukanye inshuro eshatu (2009, 2011, 2015).
Chelsea ihise yegukana igikombe cya kabiri, ijya ku mwanya umwe na Corinthians yo muri Brazil, Bayern Munich yo mu Budage na São Paulo, buri imwe ifite inshuro ebyiri.
Uru ni urugendo rwerekana uburyo amakipe yo mu Bwongereza akomeje kwiyubaka no kugaragaza imbaraga no ku rwego mpuzamahanga, aho usanga EPL (English Premier League) ari imwe mu mashampiyona yihariye ku Isi.
