Fabos Fali 
Ubutasi bw’u Burusiya bwatangaje ko ibihugu byo mu Burengerazuba bw’Isi bifite umugambi wo kwigarurira Ukraine no guhagarika amakimbirane n’u Burusiya binyuze mu kohereza ibihumbi by’abasirikare muri icyo gihugu.
Ni amakuru yashyizwe hanze n’Urwego rw’Ubutasi rw’u Burusiya, SVR. Uko guhosha amakimbirane n’u Burusiya ngo bivuze ko u Burayi bushaka gukoresha Ukraine bunyuze mu gisirikare, hanyuma bugategura ukwihorera k’u Burusiya.
SVR yavuze ko NATO iri muri gahunda yo gushinga ibigo by’imyitozo ya gisirikare bigomba kwakira nibura abantu miliyoni imwe ngo batozwe.
Iyi gahunda u Burusiya buvuga ko ishobora kuba yafasha ibihugu by’u Burayi na Amerika gusana ibikorwa bya gisirikare bya Ukraine bimaze igihe byangizwa na misile na drones z’u Burusiya.
SVR iti “Kugira ngo ibyo bigerweho, ibihugu by’u Burayi, bizigarurira Ukraine. Ibyo bizakorwa binyuze mu koherezaho ingabo muri gahunda yo kubungabunga amahoro. Uko gahunda imeze ni uko hazoherezwa ingabo ibihumbi 100 muri Ukraine.”
Uru rwego ruvuga ko muri iyi gahunda kandi Ukraine izagabanywamo ibice bine. Romania ngo izafata igice kiri ku nkengero z’Inyanja y’Umukara, Pologne igenzure igice cyo mu Burengerazuba bwa Ukraine, u Bwongereza bugenzure Amajyaruguru na Kiev. Ni mu gihe igice cyo hagati no mu Burasirazuba bw’igihugu kizagenzurwa n’u Budage.
Fabos Fali 
