Gaël Faye, umuraperi akaba n’umwanditsi w’ibitabo ufite ubwenegihugu bw’u Bufaransa n’inkomoko mu Rwanda, yatsindiye igihembo cya Prix Renaudot 2024 ku wa 4 Ugushyingo 2024. Iki gihembo yacyegukanye kubera igitabo cye gishya yise Jacaranda, cyakurikiye igitabo Petit Pays yamenyekaniyeho mu mwaka wa 2016.

Gaël Faye yatsinze abanditsi bakomeye barimo Hemley Boum, Kamel Daoud, na Hubert Haddad, byerekana ko yateye intambwe ikomeye mu mwuga w’ubwanditsi. Gutsindira Prix Renaudot byamushyize mu mubare w’abanditsi b’ibihangange mu gihugu cy’u Bufaransa.

Mu 2016, Gaël Faye yanditse igitabo Petit Pays, igitabo cyamenyekanye cyane ku rwego mpuzamahanga, kikaba cyarahinduwe mu ndimi zirenga 20 ndetse kikagurishwa kopi zisaga miliyoni 1.4. Icyo gitabo cyahesheje Gaël Faye igihembo cy’Abanyeshuri cyitwa Prix Goncourt des lycéens, ndetse gisanga muri benshi mu bitabo byakunzwe cyane.

Mu gitabo cye gishya Jacaranda, Gaël Faye agaruka ku mateka y’umwana witwa Milan, ukomoka kuri nyina w’Umunyarwandakazi, uba mu Bufaransa muri Versailles. Uyu mwana yareberaga kure amakuru yerekanaga Jenoside yakorewe Abatutsi kuri televiziyo, ibintu byamukoze ku mutima cyane. Nyina, wari umaze imyaka irenga 20 atuye i Paris, yari atarigeze amubwira amateka y’umuryango we cyangwa iby’igihugu cy’u Rwanda.

Inkuru ya Milan igaragaza uburyo uyu mwana yagize amatsiko yo kumenya inkomoko ye igihe yatangiye kubona amakuru kuri Jenoside. Amaze kubona ko hari byinshi byihishe inyuma y’amateka y’umuryango we, Milan yashatse kubaza nyina n’abandi bamubyaye, kugira ngo ahishurirwe amateka ye akomokaho.

Jacaranda ni igitabo gikora ku mutima, kikabaza ibibazo bikomeye ku bijyanye n’ubuzima bwa nyuma ya Jenoside, kumenya inkomoko, ndetse no guhuza amateka n’ubuzima bw’ejo hazaza.

Gaël Faye akomeje kwigaragaza nk’umwanditsi ufite intumbero yo gusubiza amaso inyuma ku mateka y’Abanyarwanda no gutanga ubutumwa buhanganisha abanyarwanda b’ubu n’ibyababayeho mu bihe byashize. Igikombe cya Prix Renaudot gitumye Faye aba umwe mu banditsi b’ibyamamare bafite uruhare mu gusigasira amateka no gukomeza kuganira ku nkuru z’umuryango nyarwanda, ikintu gihindura amaso y’isi ku mateka n’imibereho y’Abanyarwanda.