Ku wa 14 Mutarama 2024, mu Murenge wa Kaniga, Akagari ka Nyarwambu, Umudugudu wa Cyasaku hagaragagaye umurambo w’umusaza w’imyaka 66 y’amavuko witwa Rugwabiza Edouard, yasanzwe mu ishyamba ryegereye umupaka wa Uganda mu Karere ka Gicumbi.

Amakuru dukesha UMUSEKE ni uko uyu musaza yari asanzwe atuye mu Mudugudu wa Kinogo, akaba yarabuze ku wa Gatandatu tariki 13 Mutarama 2024. Bakomeje gushakisha bageze mu gashyamba hafi n’umupaka ku gice cy’u Rwanda, nibwo umuhungu we witwa Wariraye Jean de la Paix w’imyaka 31 yamubonye ariho yapfiriye.

Umuryango wa Rugwabiza uvuga ko yavuye iwe ku wa 13 Mutarama 2024, ababwira ko agiye muri Uganda kugura kawunga ariko ntiyataha aribwo bahise batangira gushakisha, birangira bamubonye ku wa 14 Mutarama 2024 yapfuye.

Umuyobozi w’Akarere ka Gicumbi, Uwera Parfaite, yasabye abaturage kujya birinda kunyura mu nzira zitemewe n’amategeko mu gihe bambuka imipaka mu rwego rwo kwirinda ingaruka zose.