Umunyamabanga nshingwabikorwa w’umurenge wa Rambura mu karere ka Nyabihu yatawe muri yombi n’Urwego rw’Ubugenzacyaha RIB, akurikiranweho icyaha cyo kunyereza umutungo wa rubanda usaga miliyoni 6.9frw. Yatawe muri yombi kuwa 11 Ukwakira 2023.

Amafaranga ashinjwa kunyereza yari ayo kubakira no gusana inzu z’abasenyewe n’ibiza muri Mata umwaka ushize. Aya makuru yemejwe n’umuvugizi wa RIB, Murangira B. Thiery avuga ko uyu muyobozi afungiye kuri sitasiyo ya Mukamira, dosiye ye ikaba iri gutunganwa ngo ishyikirizwe ubushinjacyaha.

Murangira yavuze ko RIB itazihanganira umuntu wese unyereza umutungo ashinzwe kugenzura awukoresha mu nyungu ze bwite, iributsa abantu ko uzabikora azafatwa agashyikiriza ubutabera. Iki cyaha ugihamijwe n’urukiko ahanishwa igifungo kitari munsi y’imyaka irindwi ariko kitarenze imyaka icumi n’amafaranga yikubye inshuro eshatu kugera kuri eshanu z’agaciro k’umutungo yanyereje.