Urwego rw’igihugu rw’ubugenzacyaha RIB rwataye muri yombi uwari umunyamabanga nshingwabikorwa w’umurenge wa Mutenderi wo mu karere ka Ngoma akekwaho kunyereza amwe mu mafaranga yari agenewe abaturage. Ni nyuma y’uko uyu mugabo yari amaze iminsi ibiri yandikiye komite nyobozi y’Akarere ibaruwa yo gusezera mu kazi.

Yandikira Komite nyobozi yavuze ko Atari ashoboye kugendana n’umuvuduko igihugu kiriho aho yasezeye mu kazi ari kumwe n’abandi bayobozi batandatu. Amakuru avuga ko yatawe muri yombi kuwa gatanu akekwako kunyereza amafaranga arimwo ayari agenewe abaturage ndetse n’ibindi byaha bitandukanye yakoreye mu kazi ubwo yayoboraga Umurenge wa Zaza.

Niyonagira Natalie, umuyobozi w’Akarere ka Ngoma yemeje aya makuru avuga ko bamenye amakuru y’uko inzego z’umutekano zataye muri yombi uwo mugabo. Yavuze ko amakuru yisumbuyeho yabazwa RIB kuko yatawe muri yombi ku nyungu z’umuturage.

Amakuru aturuka ku Igihe dukesha iyi nkuru ni uko uyu mugabo akurikiranweho icyaha cyo kunyereza amafaranga agera kuri miliyoni 1,4frw agenewe abarokotse Jenoside yakorewe Abatutsi barindwi bakoze imishinga yabateza imbere, aho ayo mafaranga yo kubafasha yashyizwe kuri konti y’umurenge aho kuyabaha akayagumana.

Amakuru avuga ko kandi hari andi mafaranga miliyoni 1frw yariye yari agenewe gukora umushinga ku Mudugudu, aho ngo ubuyobozi bwagiye kureba ibyakozwe bukabibura bikaba bivugwa ko amafaranga yari yabiteganirijwe nayo yanyerejwe. Uretse aya mafaranga kandi hari n’andi abaturage bamuhaye kugira ngo abishyurire mituweri arabura gusa ngo yaje kuyabasubiza nyuma yo kubitegekwa n’Ubuyobozi bw’Akarere.