Fabos Fali 
Umudepite wo mu Burusiya, Vitaly Milonov, yatangaje ko abona Greenland ikwiye kwiyunga ku gihugu cye aho kugira ngo ifatwe na Leta Zunze Ubumwe za Amerika, kuko u Burusiya ari bwo bwabasha kubarindira umutekano.
Impamvu ya mbere Milonov yagaragaje ni uko Greenland n’u Burusiya bifite byinshi bihuriyeho nk’indimi zimwe na zimwe, hamwe n’umuco.
Ni igitekerezo Milonov yagaragaje nyuma y’imvugo za Donald Trump zigaragaza ubushake bwe butaziguye bwo kongera iki kirwa kinini ku Isi kuri Amerika.
Vitaly Milonov, umunyapolitiki ukomeye mu Burusiya akaba n’umudepite yagarutse kuri ibi ubwo yaganiraga n’ikinyamakuru Gazeta,
Milonov waganiraga n’Ikinyamakuru cya Gazeta cyo mu Burusiya, yanavuze ko igihugu cye ari cyo cyacungira umutekano Greenland ndetse ko ubukungu bwacyoo bumeze neza bityo ko byazamura imibereho y’abaturage ba Greenland kurusha uko Amerika yabigenza.
Ati “Twumvise Trump avuga ko Canada ikennye cyane na Amerika ubwayo ifite ibibazo by’ubukungu n’ibya politiki, bityo ibi byerekana ko igihugu gihamye mu bukungu no muri politiki ari u Burusiya bukwiye gushyigikira abaturage ba Greenland’’.
Yavuze ko kandi ibyo bigomba kunganirwa n’uko kuri Greenland haba abasangwabutaka bazwi nk’Aba-Inuit, abaturage banaboneka no mu Burusiya, Milonov akavuga ko ibyo na byo biri mu byatuma Greenland yiyunga ku Burusiya kurusha uko yajya kuri Amerika.
Uyu mugabo yikije cyane ku bijyanye n’umutekano agaragaza ko u Burusiya bufite ubushobozi bwo kurinda Greenland abashaka kuyigarurira.
Imibare ya Loni igaragaza ko abaturage ba Greenland bangana na 70% bavuga ururimi ruzwi nka ‘Greenlandic’abahanga mu iyigandimi bakavuga ko urwo rurimi rufitanye isano n’uruvugwa mu gace ka Siberia ko mu Burusiya.
Greenland ni ikirwa cya Danemark giherereye mu Majyaruguru ya Amerika hagati y’inyanja za Arctique na Atlantique. Ni kirwa cya mbere kinini ku Isi kuko gifite ubuso bwa kilometero kare miliyoni 2,1. Gituwe n’abarenga ibihumbi 56.
Fabos Fali 
