Umugabo witwa Bimenyimana uri mu kigero cy’imyaka 46 y’amavuko wo mu karere ka Ruhango mu murenge wa Ruhango, arembeye mu bitaro nyuma yo gusanga umukobwa we asambana agafata umwanzuro wo kwiyambura ubuzima. Ibi byabereye mu kagali ka Gikoma mu mudugudu wa Rebero.

Abaturanyi b’uyu mugabo bavuga ko kuwa 29 Ukwakira 2023 mu ma saa tatu, yatashye ageze mu rugo asanga umukobwa we arimo gusambana, batangira gutongana, Bimenyimana ahita yinjira mu nzu afata umuti wica arawunywa atangira gusamba.

Aya makuru yemezwa n’Umuyobozi w’umurenge wa Ruhango, Wellars Kayitare avuga ko Bimenyimana yagerageje kwiyahura nyuma yo gusanga umukobwa we asambana. Yabwiye Umuseke ko raporo bahawe yemeza ko yari asanzwe afitanye amakimbirane n’umwana we bigatuma afata icyemezo cyo kwiyambura ubuzima.

Gitifu Kayitare avuga ko ibi bikimara kuba, uyu mugabo bahise bamutabara bamujyana ku kigo nderabuzima cya Nyarurama giherereye mu murenge wa Ntongwe. Ku rundi ruhande abaturage bo bavuga ko uyu mugabo nta makimbirane yari afitanye n’umukobwa we, uretse gusa kumufatira mu cyuho arimo asambana.