Abaasirikare b’igisirikare cya Congo FARDC batsinzwe urugamba na M23 bagasigarana inzira igana mu Rwanda nk’ubuhungiro, bavuze ko barwaniye intambara ku kibuga cy’indege, bikaza kurangira batsinzwe bakabura ubuhungiro hanyuma bagasigarana amahitamo amwe gusa yo kuza mu Rwanda.

Umwe mu basirikare ba Guverinoma ya Congo yavuze ko intambara barwana na M23, yabakanze cyane kuko uriya mutwe witwaje intwaro wa M23 ufite ingufu nyinshi cyane birenze urugero,  ari nayo mpamvu nyine bahunze intambara.

Abajijwe icyo basaba kugira ngo ikibazo cy’imirwano y’urudaca n’abasirikare ba M23 izarangire, yavuze ko ibyo bireba leta ya Congo, we na bagenzi be b’abasirikare nta na kimwe kibareba rwose. Aba basirikare bavuze ko nubwo bari mu Rwanda ariko bafite icyizere cy’uko bazasubira iwabo aho baturuka muri Congo.

Umupolisi witwa Julien Ngongo wari waratswe imbunda n’abasirikare ba FARDC hanyuma bakamujyana aho bari kurwanira, yavuze ko rwose kuba M23 yafashe umujyi wa GOMA ari uko perezida FATCHI yananiwe mu buryo bugaragara, ndetse intege ze zikaba zararangiye n’akazi ke kakaba kamunaniye kuva aho intambara yatangiriye, I Goma abasirikare bakomeye bakaba baroherejweyo bakananirwa ari nabyo byatumye abapolisi nabo bahitamo kwishyikiriza u Rwanda.