Mu gihugu cya Burkina Faso hari kuvugwa inkuru y’itabwa muri yombi ry’abasirikare bane barimo Lieutenant Colonel nyuma yo gukekwaho umugambi wo gushaka guhirika ubutegetsi bwa Capitaine Ibrahim Traore uyobora Burkina Faso mu buryo bw’inzibacyuho.

Inkuru yanditswe na Jeune Afrique igaragaza ko abafunzwe barimo Lt. Col Evrard Somda wahoze akuriye gendarmerie ya Burkina Faso. Amakuru agaragaza ko yatawe muri yombi ku Cyumweru tariki 14 Mutarama nyuma y’uko afatiwe mu rugo iwe ruherereye mu Murwa mukuru, Ouagadougou.

Lt. Col Somda na bagenzi be batatu, batawe muri yombi nyuma yo gukekwaho gucura umugambi wo kwivugana Perezida Ibrahim Traoré cyo kimwe na Oumarou Yabré ukuriye ubutasi bwa Burkina Faso. Uyu yatawe muri yombi mu gihe umwaka ushize ari bwo yirukanwe ku nshingano ze ashinjwa kugerageza guhungabanya umutekano w’igihugu.

Ibi kandi bibaye nyuma y’amezi gito muri iki gihugu hikanzwe Coup d’etat y’abashakaga guhirika Perezida Ibrahim Traore uri ku butegetsi.