Ku gicamunsi cyo kuri uyu wa Gatandatu tariki 17 Gashyantare 2024, umunyeshuri w’imyaka 18 wiga mu Ishuri ry’Imyuga ryo mu Murenge wa Nyamabuye mu Karere ka Muhanga yafashwe n’ibise ubwo yari muri Gare ya Muhanga, yinjira mu bwiherero ahita yibaruka.

Aya makuru yemejwe n’Umunyamabanga Nshingwabikorwa w’Umurenge wa Nyamabuye, Nshimiyimana Jean Claude ndetse avuga ko batari bazi ko atwite. Ati “Nibyo yabyariye mu bwiherero, hagati ya saa tanu na saa sita, amakuru twamenye nyuma yo kuganira n’uwo byabayeho n’umuyobozi w’ikigo yigaho, ni uko batari bazi neza ko atwite ndetse akaba ari yo mpamvu yashatse gutaha ibise bikamufatira muri Gare.”

Nshimiyimana yakomeje avuga ko uyu mukobwa n’umwana we bahise bajyanwa ku Bitaro by’i Kabgayi ndetse bahita bahamagara ababyeyi be bari batuye mu Karere ka Kamonyi, yongeyeho ko kuri ubu uwo mukobwa n’umwana we bameze neza kandi bakomeje kwitabwaho muri ibyo Bitaro.