Kuri uyu wa Gatandatu tariki 17 Gashyantare 2024, ubwo habaga inama y’Inteko Rusange y’Umuryango wa Afurika yunze Ubumwe, Guverinoma ya Somalia yatuye umujinya iya Ethiopia, nyuma y’uko inzego z’umutekano z’i Addis-Abeba zitambitse Perezida Hassan Sheikh Mohamud zikamubuza kwitabira iyi inama.

Amakuru avuga ko muri iyi nama isanzwe ya 37 y’Inteko Rusange yahuje abakuru b’ibihugu n’aba za Guverinoma zigize Umuryango wa Afurika yunze Ubumwe, Perezida Hassan Sheikh Mohamud wa Somalia ni umwe mu bayitabiriye ariko ngo yaje kugorwa cyane no kwinjira aho yabereye.

Itangazo ryasohowe na Guverinoma ya Somalia rigira riti “Twamaganye twivuye inyuma ubushotoranyi bwa Guverinoma ya Ethiopia, kuko yagerageje gukumira delegasiyo ya Perezida wa Somalia kwitabira inama y’Umuryango wa Afurika yunze Ubumwe ya 2024 i Addis-Abeba.”

Yakomeje igira iti “Ibi byabayaye binyuranyije n’amasezerano yose ya dipolomasi ndetse n’ayo ku rwego mpuzamahanga, by’umwihariko amahame yashyizweho agenga umuryango wa Afurika yunze Ubumwe.”

Perezida wa Somalia, Hassan Sheikh Mohamud yageze i Addis-Abeba ku gicamunsi cyo ku wa Gatanu, ageze ku cy’indege yakiriwe mu cyubahiro gihabwa abakuru b’ibihugu, atambuka kuri ’tapis’ y’amabara y’icyatsi n’umuhondo ndetse indirimbo zubahiriza Somalia na Ethiopia ziracurangwa.

Uyu muyobozi yateze amatwi indirimbo yubahiriza igihugu ayoboye kugeza irangiye ariko ubwo iya Ethiopia yarimo icurangwa yahise yigendera. Bikekwa ko iyi mpamvu ari yo yababaje Guverinoma ya Ethiopia, igafata icyemezo cyo kumugora no kumwangira kwinjira ahabereye inama y’abakuru b’ibihugu bya Afurika yunze Ubumwe (AU).

Ibi byabaye byatumye mu gitondo cyo kuri wa Gatandatu, ubwo Perezida Sheikh Mohamud yageraga ku Cyicaro Gikuru cya AU, yasanze inzego z’umutekano za Ethiopia zahawe amabwiriza yo kutamwemerera kuhinjira, ibyatumye akorwa n’ikimwaro ubwo yari akiri hanze.

Abayobozi bakomeye bo muri Somalia bavuganye n’ikinyamakuru ChimpReports cyo muri Uganda, bavuze ko Perezida Mohamud acyangirwa kwinjira atasebye gusa, ko ahubwo abari kumwe na we banatangiye kugira impungenge z’umutekano we bibaza ibyabaye.

Izi mpagaragara ku ruhande rwa Somalia zashize ubwo abamurinda bahamagaraga byihuse Perezida Ismail Omar Guelleh wa Djibouti, kugira ngo asabe abayobozi ba Ethiopia kwemerera Perezida wa Somalia kwitabira inama ya AU, kandi ngo Perezida Guelleh yahise atabar byihuse ikibazo kirakemeka.

Mu itangazo Guverinoma ya Somalia yashize ahagaragara yasabye Umuryango wa Afurika yunze Ubumwe gukora iperereza ryizewe kandi ryigenga ku isanganya Perezida Hassan Sheikh Mohamud yahuye na ryo, ndetse isaba uyu muryango kuvana Icyicaro cyawo Gikuru i Addis Abeba, nyuma yo gushinja Ethiopia kunanirwa gufata abayobozi bose ba Ethiopia kimwe.

Kuri uyu wa Gatandatu ubwo Perezida wa Somalia, Sheikh Hassan Mohamud yagezaga ijambo ku bitabiriye inama ya AU, yashinje Ethiopia kugerageza gutwara ubutaka bwa Somalia ndetse amakuru avuga ko iyi nama ikirangira Perezida Sheikh Hassan Mohamud yahise yihutira gutaha asubira mu gihu cye.