Umuhanuzi wavuze ko Imana yahisemo kumwita izina rya Zakayo yatangaje ko ubwo yari arayamye mu masaha y’ijoro yagize iyerekwa akanaganira n’Imana, agatembera mu ijuru ndetse ngo aho mu ijuru yari ari yahabonye nyakwigendera Pasiteri Theogene witabye Imana akoze impanuka y’imodoka, akamubwira ko atigeze apfa kubera yakoreye Imana ahubwo ngo kuri ubu yibereye mu ijuru.

Prophet Zakayo atangaje ibi nyuma y’igihe ku mbuga nkoranyambaga hari gucicikana inkuru y’umugabo witwa Hategekimana uvuga ko ari mu bishe uyu Pasiteri Theogene, ubwo yari yahawe ubutumwa n’ab’ikuzimu ngo kuko yari atangiye kugarukira Imana cyane. Hategekimana yatambukije ikiganiro cyasakaye ahantu henshi avuga ati “Pasiteri Theogene nitwe twamwishe kandi ndi mu banyoye amaraso ye.”

Muri iki kiganiro cyanyuze kuri shene ya YouTube yitwa UMUSARABA TV, Prophet Zakayo, yavuze ko intebe uyu Hategekimana wari uherutse kuvuga ko ari mu bishe Pasiteri Theogene yari yicaranyeho n’abadayimoni Imana yayubitse bityo ko ntacyo bazongera gukora kuri iyi Si ngo bakomeze bababaze abantu bakunda Imana ndetse n’uyu muryango wa nyakwigendera.

Zakayo yavuze ko mu iyerekwa yagize, yageze mu ijuru agasangayo Pasiteri Theogene ‘Inzahuke’ ndetse ngo aho yamubonye yabonye hari korari y’abaririmbyi, mu gihe we yari umuyobozi wayo. Yavuze ko ngo mu butumwa yahawe na Pasiteri Theogene yavuze ko atigeze apfa nk’uko abantu babitekereza kubera ko yakoreye Imana ndetse ngo imbaraga n’impano nari mfite Imana yabyimuriye mu bantu bankundaga.

Yagize ati “Mu byantunguye nasanze iyo korari iyobowe na Pasiteri Theogene, nsanga Theogene yarabaye mwiza, arabagirana…[abivuga arira], afite igitabo kirimo inyuguti nyinshi, ari we ubwira abantu ngo baririmbe. Arambwira nti ‘genda ubwire abantu bose ku Isi,ngo impano n’imbaraga zose nari mfite ku isi Imana yabyimuriye mu bantu bankundaga ndetse ntimugahangayike kuko ntabwo napfuye kuko nakoreye Imana.”

Uyu muhanuzi yakomeje avuga ko Imana yamubwiye ko igiye kumwaza abantu bose bakomeje kuzamukira ku izina rye mu bibi nyamara we yarakoze umurimo w’Imana ubuzima bwe bwose. Zakayo atangaje ibi mu gihe muri iyi minsi hakomeje gusakara abantu benshi bavuga ibintu kuri Pasiteri Theogene ndetse n’umuryango we, bavuga ko ari abahanuzi nyamara abenshi bagakomeza kuvuga ko baba bashaka kuzamukira kuri uyu muryango.

Reba ikiganiro uyu muhanuzi yakoze ukanze aha