Umuyobozi ushinzwe Abanyarwanda baba mu mahanga muri Minisiteri y’Ububanyi n’Amahanga, Maziyateke Sandrine, yagaragaje ko hari urubyiruko rutarasobanukirwa n’inyungu zo kuba Umunyarwanda nubwo ari bake. Ndi Umunyarwanda, Ingabo n’urukingo cyari ikiganiro cyarebaga urubyiruko mu ihuriro rya 16 ry’Umuryango Unit Club Intwararumuri.

Mu ihuriro rya 16 ry’Umuryango Unit Club Intwararumuri urubyiruko rwasabwe kuba umusemburo mu gushimangira gahunda y’Ubudaheranwa bakirinda ingengabitekerezo ya Jenoside ikomeje gukwirakwizwa ku mbuga nkoranyambaga. Urubyiruko rwagaragarijwe kandi ko gahunda ya Ndi umunyarwanda ari inkingi yo kubaka igihugu no gusigasira Ubumwe bw’Abanyarwanda.

Mudahemuka Audace, Umuhuzabikorwa w’umuryango AERG, yagaragaje ko nubwo hari gahunda imaze kugerwaho muri gahunda y’Ubudaheranwa, bamwe mu rubyiruko rwiganjemo abavutse nyuma ya Jenoside yakorewe Abatutsi mu 1994 rugifite imyumvire y’ingengabitekerezo ya Jenoside rukomora mu miryango yabo.

Umuhanzi Andy Bumuntu we yagaragaje ko icyerekezo cy’urubyiruko rwifuzwa ari urutarangwa n’amacakubiri. Musenyeri Servilien Nzakamwita yagaragaje ko urubyiruko rukwiye kwigishwa indangagaciro z’Ubunyarwanda hashingiwe kubyo bakunda. Mu ihuriro rya 16 ry’Umuryango Unit Club Intwararumuri, urubyiruko rwasabwe gukoresha imbuga nkoranyambaga ruhangana n’abazifashisha bakwirakwiza ingengabitekerezo ya Jenoside.