Guverineri w’Intara ya Kinshasa, Gentiny Ngobila nyuma yo gushinjwa ubujura bw’amajwi no kwiba ibikoresho byari kwifashishwa mu matora y’Umukuru w’Igihugu yabaye ku wa 20 Ukuboza 2023 muri RDC, yasabwe kwegura akanishyikirizwa ubutabera.

Ibi byatangajwe ku wa Kabiri tariki 09 Mutarama 2024, aho Inteko ishingamategeko y’Intara y’Umurwa mukuru wa RDC, Kinshasa, yavuze ko yakuye ubudahangarwa kuri uyu Guverineri imutegeka ko yakwegura mu masaha atarenze 24 ndetse akishyikiriza ubucamanza. Mu byaha uyu Guverineri ashinjwa harimo ubugizi bwa nabi, kwiba amajwi no kwiba ibikoresho by’itora.

Nk’uko BBC yabitangaje Guverineri Gentiny Ngabila Mbaka ari mu bantu 82 Komisiyo y’amatora ya RDC yasheshe ibyavuye mu matora kuri bo kubera ibyaha birimo kwiba amajwi no gutunga imashini z’itora mu matora yabaye mu mpera z’umwaka ushize, abo uko ari 82 bagiye bagana inkiko ngo zibarenganure ariko byarangiye Umushinjacyaha abategetse ko batagomba gusohoka igihugu.

Guverineri Gentiny akuweho ubudahangarwa nyuma y’uko Urukiko rushinzwe kurinda Itegeko Nshinga rwemeje ko Tshisekedi ariwe Perezida wa Repubulika Iharanira Demokarasi ya Congo bidasubirwaho kuko yatsinze amatora. Ndetse uru rukiko rwatesheje agaciro ibirego birimo iby’abakandida umunani bari bahanganye na Tshisekedi kuyobora iki gihugu.