Urubanza rwa Ishimwe Dieudone wamenyekanye nka Prince Kid, wagombaga kuburana kuri uyu wa Gatanu mu bujurire, rwimuriwe indi tariki.  Byari biteganyijwe ko Prince Kid aburana ubujurire bwe kuri uyu wa Gatanu tariki ya 10 Werurwe 2023, gusa urubanza rwe rwimuwe.  Mukansanga Salima yahawe igihembo cy’umugore wakoze ibikorwa by’indashyikirwa muri Afurika.

Urukiko Rukuru rwimuye iburanisha ku bujurire bw’Ubushinjacyaha kubera ko kuri uwo munsi hateganyijwe Inama y’Urukiko nk’uko Inyarwanda dukesha iyi nkuru babitangaje. Imanza zari ziteganyijwe uwo munsi zahawe amatariki mashya. Uru rubanza ubushinjacyaha bwarezemo Ishimwe Dieudonné wamenyekanye nka Prince Kid, wateguraga amarushanwa y’ubwiza ya Miss Rwanda, rwimuriwe kuwa 31 Werurwe 2023.

Prince Kid azasubira mu rukiko atari ingaragu kuko ubu yamaze gusezerana mu mategeko na Miss Elsa mu muhango wabereye mu murenge wa Rusororo mu minsi micye ishize. Prince Kid agiye gusubira mu rukiko kandi nyuma y’uko Urukiko Rwisumbuye rwa Nyarugenge rwamugize umwere mu Ukuboza 2022 ku byaha yari akurikiranyweho, ariko Ubushinjacyaha ntibwanyurwa.

Prince Kid washinze Rwanda Inspiration Back Up yeteguraga irushanwa rya Miss Rwanda, yaregwaga gukoresha undi imibonano mpuzabitsina ku gahato, gusaba no gukora imibonano mpuzabitsina ku gahato no guhoza undi ku nkeke bifitanye isano n’imibonano mpuzabitsina. Ishimwe Dieudonné yafungiwe muri Gereza ya Nyarugenge iri i Mageragere kuva ku wa 16 Gicurasi 2022 kugeza ku wa 2 Ukuboza 2022, ubwo yagirwaga umwere ku byaha yaregwaga.