Uwahoze ari Minisitiri w’ubukerarugendo muri Kenya, Najib Balala, yatawe muri yombi azira ruswa ivugwa ko irimo miliyari 8.5 z’amashiringi ya Kenya ubwo ni asaga miliyoni 54 $. Uyu mugabo yahise atabwa muri yombi kugira ngo hakorwe iperereza ku kwishyura mu buryo budasanzwe miliyari 8.5 z’amashiringi ya Kenya, yagenewe kubaka ishuri rikuru rya Utalii mu Ntara ya Kilifi.

Aya makuru yemejwe n’Umuvugizi wa komisiyo ishinzwe imyitwarire no kurwanya ruswa muri Kenya, Eric Ngumbi, ku wa Gatatu w’iki Cyumweru. Ngumbi yavuze ko na Leah Gwiyo wahoze ari umunyamabanga mukuru wa Minisiteri w’Ubukerarugendon na we yatawe muri yombi.

Yagize ati “Bazajyanwa mu Mujyi wa Malindi kugira ngo bakurikiranwe aho ubushinjacyaha bwemeje ibyifuzo byacu.” Aba bombi ubwo bitabaga imbere y’umucamanza mukuru wa Malindi, James Mwaniki, bahakanye ibyo baregwa maze batanga ingwate ya miliyoni 5 y’impapuro mvunjwafaranga, kugira ngo barekurwe, ndetse batanga miliyoni imwe y’amashiringi nk’uko bitangazwa na Businessdaily.

Najib Balala, yabaye Minisitiri w’ubukerarugendo muri Kenya imyaka 12, yakoranye na Guverinoma eshatu ari kuri uwo mwanya, akaba amaze igihe kirekire muri politiki aho yabigize umwuga.