Fabos Fali 
Hegitari zibarirwa mu bihumbi zimaze kwibasirwa n’inkongi ikaze yiswe Palisades yatangiye ku wa Kabiri w’iki cyumweru muri Los Angeles, ikaba imaze gutuma abaturage barenga 30.000 bava mu ngo zabo.
Iyi nkongi yatangajwe saa 20:30 ku masaha y’i Kigali, nyuma y’iminota 20 gusa iba ikwiye hegitari zirenga umunani, nyuma ziriyongera zigera no kuri 80.
Ku mugoroba wo ku wa Gatatu, iyi nkongi yari imaze gukwira mu bice by’Umujyi wa Los Angeles n’inkengero zawo ku buso bwa hegitari hafi 6.500.
Abashinzwe kuzimya inkongi barenga 1.400 barimo kurwana no kuyihagarika nubwo ikomeje gukwirakwizwa n’umuyaga ukaze wa ’Santa Ana’, ikaba ari yo mpamvu ubukana bwayo bukomeje kwiyongera.
Inzego ziri mu bikorwa by’ubutabazi zatangaje ko bikigoranye cyane kuba iyi nkongi yahagarikwa burundu.
Inzu zirenga 1.000 zimaze kuhakongokera, hakaba hamaze gutangazwa imfu z’abantu batanu.
Indege kabuhariwe zifashishwa mu kuzimya zirimo kugorwa kubera ingufu z’umuyaga mwinshi, bikaba byatumye hakoreshwa imodoka n’imashini nini.
Ingendo z’imodoka zisanzwe mu mihanda iri muri utu duce twibasiwe n’inkongi zahagaritswe, mu rwego rwo kutabangamira ubutabazi.
Fabos Fali 
