Ignace DUKUZIMANA Kuri uyu wa Mbere, tariki ya 13 Nyakanga 2025, mu masaha y’igitondo, inkongi y’umuriro yibasiye inyubako y’ubucuruzi igeretse gatatu izwi cyane nko kwa ‘Jacob’, iherereye mu gace ka Nyabugogo hafi ya gare, mu Karere ka Nyarugenge, Umurenge wa Kimisagara, Akagari ka Nyabugogo.
Iyo nyubako ni imwe mu zikoreramo ubucuruzi butandukanye burimo amaduka acuruza imyambaro, ibikoresho by’ikoranabuhanga, ibiribwa n’ibindi, bikaba byaraye bibaye indiri y’inkongi itunguranye yatumye.
Umuvugizi wa Polisi mu Mujyi wa Kigali, CIP Wellars Gahonzire, yahamije iby’iyi nkongi . Yagize ati: “Ni byo koko habaye inkongi y’umuriro, ariko twahagobotse vuba. Nta muntu wahasize ubuzima cyangwa ngo akomereke, ndetse twashoboye kuyizimya tutaragerwaho n’ingaruka nyinshi.”
Ahagana saa mbili za mu gitondo nibwo abaturage batangiye kubona umwotsi mwinshi uva mu igorofa rya mbere w’iyo nyubako, bituma bamwe batangira gusohoka n’icyo bari bafite cyose, abandi batabaza inzego z’umutekano. Polisi y’u Rwanda, binyuze mu Ishami ryayo rishinzwe kurwanya inkongi (Fire Brigade), yageze aho hantu ku gihe, yitwaje imodoka n’ibikoresho bigezweho byo kuzimya inkongi, irwana n’umuriro mu buryo bwihuse.
Abaturage barashima uko Polisi yihutiye kurokora ibikorwa byabo n’ubuzima bwabo. Umucuruzi witwa Jean de Dieu M., wakoreraga muri iyo nyubako, yagize ati: “Turashimira inzego z’umutekano cyane. Nta byinshi byangiritse kuko Polisi yahise ihagera vuba. Twari tubaye amazi.”
Nubwo iyi nkongi itagize ubuzima igira ku bantu, hari ibicuruzwa byahiye byari mu bubiko bwo mu igorofa rya mbere, n’amaduka atari make yangiritse nko ku bikoresho by’amashanyarazi n’imyenda. Amakuru avuga ko hari bake bake bafite ibyangiritse bagerageza kubarirwa ibihombo.
Polisi yatangaje ko impamvu y’inkongi ikirimo gukorwaho iperereza. Gusa hari bake bake bavuga ko hari hashobora kuba harabayeho ikosa ry’amashanyarazi, ariko aya makuru ntabwo arasohoka ku mugaragaro kuko iperereza rikiri mu ntangiriro.
