Ibendera ry’opozisiyo  yafashe ubutegetsi muri  Siriya ryashyizwe hejuru kuri ambasade y’iki gihugu i Moscou nyuma y’uko Perezida Bashar Assad akuwe ku butegetsi n’ihuriro ry’abarwanyi ku wa gatandatu.

Ku cyumweru, abakozi ba ambasade bakuyeho ibendera rya Repubulika ya Siriya hamwe n’icyapa cyarirangaga ku nyubako. Ku wa mbere, hasimbujwe ibendera rishya rifite imirongo itatu y’amabara: icyatsi, umweru, n’umukara, hamwe n’inyenyeri eshatu zitukura. Ibendera rya kera ryari rifite umurongo utukura aho icyatsi kiri ubu, ndetse rikaba ryari rifite inyenyeri ebyiri gusa hagati.

Nk’uko byatangajwe na TASS, ahantu hakikije ambasade ya Siriya hari amahoro kandi ambasade ikomeje gukora nk’uko bisanzwe.

Ibendera rishya ryazamuwe no kuri ambasade za Siriya mu bindi bihugu birimo Espagne, Ubugereki, Seribiya, na Suwede.

Ambasade zose zatangaje ko zizakomeza guha serivisi Abanyasiriya bari mu mahanga, nk’uko byasohotse mu itangazo rya Minisiteri y’Ububanyi n’Amahanga ya Siriya.

Amatsinda atandukanye ya’opozisiyo, arimo Hayat Tahrir-al-Sham (abarwanyi b’abajihadiste) na Free Syrian Army, ishyigikiwe na Leta Zunze Ubumwe za Amerika, bafashe umujyi wa Damascus ku cyumweru nyuma yo kwigarurira igihugu mu buryo bwihuse. Ingabo za Siriya zarahunze, naho Bashar Assad wahoze ari Perezida we n’umuryango we bahawe ubuhungiro mu Burusiya.