Dukuzimana Ignace Abanyeshuri barenga 70 bariye ibiryo mu kigo bajyanwa kwa muganga igitaraganya, bikekwa ko byari bihumanye. Ni k’Urwunge rw’amashuri rwa Gahushyi mu karere ka Ngoma mu murenge wa Rukira.
Abo banyeshuri bihutanwe mu bitaro bya Kibungo abandi bajyanwa ku Kigo nderabuzima cya Gituku nk’uko byemejwe n’Umuyobozi w’umurenge wa Rukira, Buhiga Josue.
Yabwiye BTN ko nubwo ibyo byabaye atakwemeza ko ayo mafunguro abanyeshuri bariye ahumanye kuko nta bushobozi bwo gupima afite, hari ibyagiye gusuzumwa hakazamenyekana ikizava mu isuzuma. Icyakora yavuze ko bakeka ko bashobora kuba bariye ibiryo bidahiye cyangwa bidatetse neza.
Gitifu Buhiga yasabye abayobozi b’amashuri kujya bita ku isuku y’ibiribwa bihabwa abanyeshuri mu kwirinda ko ubuzima bw’abanyeshuri bamererwa nabi.
Dukuzimana Ignace 