Ku wa 1 Werurwe 2024, Indege ya Sosiyete yo mu Misiri ikora ubwikorezi bwo mu kirere, EgyptAir yahagaritse urugendo rwavaga ku Kibuga cy’Indege Mpuzamahanga cya Kigali nyuma y’uko igonganye n’ibisiga.

Amakuru avuga ko iyi ndege yo mu bwoko bwa Boeing 737/800 yari itwaye abagenzi 116, yagonganye n’ibisiga ubwo yari iri guhaguruka ku Kibuga cy’Indege.

Ubwo umupilote wari utwaye iyi ndege yari amaze kubona iyi mpanuka yahise asubika urugendo, maze EgyptAir ihitamo gucumbikira aba bagenzi muri hoteli zitandukanye zo mu Mujyi wa Kigali.

Icyakora iyi mpanuka ikimara kuba abakanishi b’iyi ndege bahise bihutira gusuzuma niba nta kibazo yagize mbere y’uko ikora urundi rugendo urwo arirwo rwose.