Kuri uyu wa 23 Mutarama 2024, hatangiye gusakara amakuru avuga ko hari abayobozi batandatu bandikiye Inzego z’Ubuyobozi basezera mu nshingano bari bafite, barimo Umunyabanga Nshingwabikorwa w’Akarere ka Muhanga Bizumuremyi Al Bashir, Umunyamabanga Nshingwabikorwa w’Akarere ka Rulindo Kanyangira Ignace, Umuyobozi w’Imirimo rusange(DM) w’Akarere ka Huye Muhanguzi Godfrey n’abandi Bayobozi bane (4).

Amakuru UMUSEKE dukesha iyi nkuru watangaje ni uko Umunyamabanga Nshingwabikorwa w’Akarere ka Muhanga, Bizumuremyi Al Bashir, na mugenzi we baguranye kuri uyu mwanya  mu Karere ka Rulindo, Kanyangira Ignace basezeye ku kazi bari bashinzwe maze bakurikirwa n’Umuyobozi w’Imirimo rusange (DM) w’Akarere ka Huye, Muhanguzi Godfrey wahise asezera ku nsingano yari afite.

Aya makuru akomeza avuga ko mu bandi banditse basezera ku mirimo yabo harimo Umuyobozi w’Ishami ry’Ubutegetsi n’Imali mu Karere ka Rulindo, Mugisha Delice, Umuyobozi w’Ishami ry’Ubutaka, Imiturire n’ibikorwaremezo(One Stop Center) mu Karere ka Rulindo, Bavugirije Juvénal, na Niyonsenga,  Umuyobozi w’Ishami ry’ubutaka, Imiturire n’ibikorwaremezo mu Karere ka Gicumbi.

Bivugwa ko aba bose basezeye ku mirimo bakoraga bahoze bakorera mu Karere ka Rulindo bamwe bakaza kwimurwa mu buryo butumvikana, Maze boherezwa mu Turere dutandukanye turimo Muhanga, Huye na Gicumbi. Icyakora hari andi makuru avuga ko ababahaye iyo mutation bashakaga kurimanganya ibimenyetso by’inyereza ry’amafaranga y’ingurane z’abaturage bashinjwa kunyereza.

Gusa nubwo biri kuvugwa nta rwego na rumwe rwari rwemeza aya makuru ndetse hari amakuru avuga ko aba bose bigeze gufungwa bashinjwa kunyereza amafaranga y’ingurane z’abaturage  ariko baza kurekurwa by’agateganyo.

Ivomo: UMUSEKE