Amakuru ava muri Repubulika Iharanira Demokarasi ya Congo aravuga ko Ingabo za Kinshasa (FARDC) n’abambari bazo barimo FDLR, Wazalendo ndetse n’Ingabo z’Abarundi zimaze kwikora munda nyuma y’uko indege y’intambara yo mu bwoko bwa Sukhoi-25 ibarasheho mu gace ka Kiluku munsi y’umusozi wa Bweramana.

Nk’uko byatangajwe na Kivu News24 iyi ndege yarashe kuri ibi birindiro yibeshye ko irashe ku barwanyi ba M23 hapfa abasirikare benshi batatangajwe umubare, mu mafoto yagaragaye kuri uru rubuga yagaragaje imirambo myinshi bivugwa ko ari Ingabo z’Abarundi baje gufasha FARDC kurwanya umutwe wa M23.

Intandaro y’uku kwikora mu nda, byaturutse ku kuba FARDC yikanze ibitero by’inyeshyamba za M23, ihita ihagurutsa indege ya Sukhoi-25 maze yibeshya ku bipimo (Coordonnees) niko guhita yohereza ibisasu ku birindiro byayo igitaraganya. Ibi bibaye mu gihe guhera mu rukerera haramutse imirwano ihuza impande zombi.

Umutwe wa M23 watangaje ko izi ngabo za Leta n’abazishyigikiye bakomeje kurasa bibanda ahari abaturage benshi bamwe bikabaviramo kubura ubuzima. Icyakora hari andi makuru avuga ko ku mugoroba wo kuri uyu wa mbere, ibindi bisasu byaguye mu mujyi wa Sake bivuye mu gace ka Karuba aho imirwano ikomeje kuba hagati y’inyeshyamba za M23 n’ingabo za RD Congo (FARDC) zifatanije na Wazalendo.