Hamaze igihe hari amashusho ari gukwirakwira ku mbuga nkoranyambaga cyane cyane kuri Youtube, y’abantu bavuga ko bagororerwaga muri gereza ariko abashinzwe kubagorora bakabakorera iyicarubozo babakubita banabatoteza. Aba bavuga banagaraza ibibazo bahuye nabyo muri gereza aho byabasigiye n’uburwayi mu mubiri wabo.

Urwego rw’Igihugu rw’ubugenzacyaha RIB ruravuga ko hari abakozi b’Urwego rushinzwe amagereza rwataye muri yombi bakaba bari gukurikiranwaho gukubita abagororwa. Umunyamakuru Nkundineza Jean Paul avuga ko mu bafashwe harimo SCP Kayumba Innocent, wigeze kuba umuyobozi w’igororero rya Rubavu ndetse na Nyarugenge, icyakora akaba yarigeze gufungwa imyaka 5 akurikiranweho ubujura.

Umuvugizi wa RIB, Murangira B. Thierry yabwiye Umuseke ati “nibyo koko, hari abakozi b’urwego rushinzwe abagororwa bari gukurikiranwa kubera gukubita abagororwa. Nta byinshi ndi buyitangazeho hato bitabangamira iperereza.” Icyakora nubwo atashatse kuvugaho byinshi, amakuru avuga ko hari abagera kuri 7 batawe muri yombi.

Bamwe mu batanze ubuhamya bavuga ihohoterwa bakorewe mu igororero, harimo uwitwa Ndagijimana Emmanuel ndetse na Dr. Niyitegeka Theoneste bari bari kugorororerwa mu Igororero rya Rubavu. Ubuhamya bwabo turi kubukusanya mu nyandiko tuzabubagezaho vuba.