Kuri uyu wa Gatandatu tariki 09 Ukuboza 2023, umwana wa Perezida wa Somalia, Mohammed Hassan Cheikh Mohamoud, yahunze ava mu gihugu cya Turikiya nyuma y’uko Inzego z’Ubugenzacyaha muri icyo gihugu zimukurikiranye ku cyaha cyo kugonga umuntu agapfa. Ndetse nk’uko amakuru abivuga ngo yashyiriweho impapuro zo kumuta muri yombi.

Meya usanzwe uyobora Istanbul, Ekrem Imamoglu, utavuga rumwe n’ubutegetsi bwa Perezida wa Turikiya, Recep Tayyip Erdogan, yavuze ko irekurwa rya Mohamoud ryagizwemo uruhare n’ubutegetsi, kuko mbere Polisi yari yamutaye muri yombi nyuma akaza kurekurwa mu buryo budasobanutse ari nabyo byatumye ahita atoroka.

Bivugwa ko Mohamoud yishe umunyamaguru tariki 30 Ugushyingo amugonze n’imodoka ku manywa y’ihangu, uwo mugabo wagonzwe yitwa Emre Gocer, akaba yaraje gupfa nyuma y’iminsi itandatu agonzwe, uwo mugabo yari afite abana babiri n’umugore. Hashyizweho impapuro zo kumuta muri yombi, bageze aho yabaga basanga yaratorotse.