Ku wa Gatanu tariki 12 Mutarama 2024, nibwo inkuru yamenyekanye ko abakinnyi b’Abanyarwanda 16 bitabiriye imikino ya “East African Junior Championship 2024” mu Burundi, batashye irushanwa ritarangiye nyuma y’uko iki gihugu gifunze imipaka yose igihuza n’u Rwanda.

Amakuru avuga ko aba bakinnyi batashye mu masaha y’igicamunsi ku wa Gatanu ndetse ngo baje batanamenyesheje abateguye iri rushanwa. Aba Banyarwanda bari bagiye muri irushanwa rya Tennis rigomba gusozwa kuri iki cyumweru tariki 14 Mutarama 2024.

Umunyamabanga Uhoraho muri Minisiteri ya Siporo, Niyonkuru Zephanie yabwiye IGIHE dukesha iyi nkuru ko abana batashye kubera imyanzura yafashwe na Guverinoma y’u Burundi. Ati “Ni byo, abakinnyi bageze hano mu Rwanda ku wa Gatandatu, uzi ingamba Leta y’u Burundi yafashe rero ntabwo byaba byiza urekeyeyo abana mu bihe nk’ibyo.”

Aba bakinnyi batashye nyuma y’uko u Burundi bwafashe umwanzuro wo gufunga imipaka yose ihuza iki gihugu n’u Rwanda kuva tariki 11 Mutarama 2024, irushinja ko rufasha umutwe wa RED-Tabara urwanya ubutegetsi bw’u Burundi.