Perezida wa Repubulika Iharanira Demokarasi ya Congo, Felix Antoine Tshisekedi yahise atumiza inama y’Abaminisitiri igitaraganya nyuma y’uko mu Mujyi wa Goma harashwe igisasu ntihamenyekane uwaba wagiteye hagati y’ingabo za Leta FARDC cyangwa M23.

Iki gisasu cyatewe i Goma mu masaha yo ku mugoroba kuri uyu wa Gatanu tariki 02 Gashyantare 2024, giterwa muri quartier ya Mugunga muri Komine Kalisimbi hafi n’ishuri ryisumbuye rya Nengapeta muri uyu Mujyi wa Goma.

Ubwo iki gisasu cyamaraga guturitswa, Perezida w’iki gihugu Tshisekedi yahise atumiza inama y’Abaminisitiri igitaraganya kugira ngo higwe kuri iyi mirwano mu rwego rwo kurinda umujyi wa Goma. Ibi bibaye nyuma y’uko ubwo yari mu bikorwa bye byo kwiyamamaza yabwiye abaturage ko M23 niyibeshya ikarasa i Goma azahita ayitsinsura.