Ishimwe Dieudonne uzwi nka Prince Kid agiye kongera kwitaba Urukiko Rukuru kugira ngo akomeze yisobanure ku byaha akurikiranweho birimo guhoza ku Nkeke bifitanye isano n’imibonano mpuzabitsina. Imyiteguro y’uru rubanza irasubukurwa kuri uyu wa 15 Nzeri 2023 nyuma y’uko rwari rwarasubitswe muri Nyakanga 2023.

Uru rubanza rugiye gukomeza nyuma y’uko Prince Kid asezeranye na miss Iradukunda Elsa, rwagakwiye kuba rwarasomwe muri Kamena 2023 icyakora Urukiko rukuru rwanzura ko iburanisha ryongera gutangira kubera amajwi mashya Ubushinjacyaha bwatanze, atarigeze aburanwaho.

Muri Nyakanga 2023 ubwo iburanisha ryasubukurwaga, yaba Prince Kid n’abamwunganira batanze inzitizi ku nyandiko isobanura amajwi yatanzwe n’Ubushinjacyaha nk’ikimenyetso gishya bagombaga kwisobanuraho, ibyo bijyana na raporo y’abahanga igaragaza ko amajwi yafashwe ari ay’umwimerere, bavuga ko batiteguye kubyireguraho.

Iyi ngingo Urukiko rwayihaye agaciro, rwemeza ko urubanza rusubikwa, rukazaburanwa kuwa 15 Nzeri 2023. Uyu mugabo, akurikiranweho ibyaha byo gukoresha undi imibonano mpuzabitsina ku gahato no guhoza undi ku nkeke bifitanye isano n’imibonano mpuzabitsina.