Fabrice Nahimana Mu gihe umutekano ikomeje kwifata nabi mu burasirazuba bwa DRC, izindi Ngabo z’u Burundi zoherejwe ku bwinshi muri Teritwari za Fizi na Uvira. Uku kohereza ingabo bigamije gukumira inyeshyamba za M23 na Twirwaneho, imitwe ibiri yitwaje intwaro ishinjwa gushaka kwagura aho igenzura mu misozi miremire ya Kivu y’Amajyepfo.
Amakuru dukesha Kigalidailynews avuga ko Ingendo nyinshi z’abasirikare zagaragaye hirya no hino mu bice by’ingenzi bya Bijombo na Minembwe, bituma havuka ubwoba bw’imirwano ishobora gufata intera muri aka karere.
Izi ngendo zavuzwe mu minsi ishize mu burasirazuba bwa Repubulika ya Demokarasi ya Congo, aho bivugwa ko kuva ku wa Gatatu, ingabo nshya z’Abarundi zambutse Ikiyaga cya Tanganyika, zinjira muri Teritwari za Uvira na Fizi, muri Kivu y’Amajyepfo.
Intego: ni ugukaza ibirindiro bya gisirikare mu gihe imitwe ya Twirwaneho na M23 ikomeje kuzamuka mu mbaraga inateganya kwirukana muri Uvira Ingabo za FARDC n’abafatanyabikorwa bazo barimo Ingabo z’u Burundi.
Igisubizo gihuriweho nyuma y’imirwano ikaze
Nk’uko amakuru aturuka muri ako gace agera kuri SOS Medias Burundi abitangaza, uku kwisuganya gushya kuje nyuma y’imirwano ikaze yabaye mu cyumweru gishize i Kahololo (muri Teritwari ya Uvira) ndetse na vuba aha i Rugezi (muri Teritwari ya Fizi).
Izi ntambara zahuje Ingabo z’Abarundi, imitwe yitwara gisirikare ya Wazalendo, FARDC (Ingabo z’igihugu cya DRC) n’abarwanyi ba Twirwaneho, umutwe witwaje intwaro w’Abanyamulenge ukorana na M23.
Mu gitondo cyo kuri uyu wa Kane ushize, abasirikare benshi b’Abarundi bari ku cyambu cya Mboko, mu Murenge wa Tanganyika, babwiye abaturage ko berekeje i Bijombo, agace k’ingenzi k’imisozi miremire, bagiye guhangana n’inyeshyamba zaho.
Inshingano zabo, nk’uko amakuru y’umutekano abitangaza, ni ukubuza M23 gutera imbere yerekeza i Bijombo, Rurambo na Minembwe.
Indi mitwe y’ingabo yagaragaye muri Swima, mu cyerekezo cya Gihamba na Kajembwe, muri Gurupoma ya Bijombo n’ubundi. I Kirumba, ahari ibirindiro bizwi cyane bya Twirwaneho, abaturage baratinya ko hashobora kubera imirwano vuba.
Ingabo z’Abarundi ku murongo w’imbere
Ingabo z’Abarundi zasubiye inyuma by’agateganyo nyuma y’imirwano yabereye i Rukezi bivugwa ko zagaragaye ahitwa Mukela. Ngo baba bari kuhategurira igitero ku birindiro bifitwe na Twirwaneho n’abafatanya na yo. Muri Mulima, undi mutwe urimo kugerageza gufungura inzira werekeza Minembwe, agace kari mu gihirahiro kinini.
Ibi bikorwa bibaye nyuma y’inama yo gufata ingamba yabaye ku itariki ya 14 Gicurasi muri Uvira yahuje Abagaba bakuru b’Ingabo z’u Burundi (FDNB) n’iza Congo (FARDC).
Nk’uko amakuru aturuka mu nzego z’umutekano abitangaza, ngo iyi nama yaba yaranzuye kongera ubufatanye bw’ibihugu byombi mu gukumira M23 na Twirwaneho.
Iyi mitwe yombi yitwaje ibirwanisho irashinjwa gushaka kwagura aho igenzura kugera muri Uvira, ndetse ni biba ngombwa n’i Bujumbura, umurwa mukuru w’ubukungu w’u Burundi uherereye munsi y’ibirometero 30 uvuye ku mupaka.
Kwiyongera k’uruhare rwa gisirikare rw’u Burundi
Ingabo z’Abarundi zabanje koherezwa mu turere twa Uvira, Fizi na Mwenga muri Kivu y’Amajyepfo mu 2022 zigiye kurwanya inyeshyamba z’Abarundi zo mu mitwe ya Red-Tabara na FNL.
Ariko, inshingano zazo zagutse vuba: abasirikare b’Abarundi bagera ku 10,000 ubu barimo gukorana n’Igisirikare cya FARDC hamwe n’inyeshyamba z’Abanyekongo zishyigikiye guverinoma mu kurwanya M23.
Inshingano zabo nshya ariko ngo zisa nk’aho ari Twirwaneho, umutwe witwaje intwaro ugizwe ahanini n’Abanyamulenge. Uyu mutwe ushinjwa gukorana na M23 yongeye kubura intwaro mu 2021 ubu ikaba imaze kwigarurira igice kinini mu ntara za Kivu zombi harimo imirwa mikuru yazo, Goma na Bukavu.
