Fabrice Nahimana Ikibuga Mpuzamahanga cy’Indege cya Goma kiri mu Burasirazuba bwa Repubulika Iharanira Demokarasi ya Congo kiri gutunganywa n’abashinzwe isuku n’inzobere mu gutegura ibisasu.
Iki gikorwa kiyobowe n’abakozi b’Umuryango w’Abibumbye bari mu butumwa bw’amahoro muri RDC, ndetse abasirikare b’Abanya-Bangladesh ni bo bari kurinda umutekano w’abashinzwe gutunganya iki kibuga cy’indege.
Abashinzwe gusukura iki kibuga cy’indege basabwe gukora imirimo nta bwoba, basabwa kumenyesha bwangu inzobere mu gutegura ibisasu bakorera mu muryango Afrilam.
Afrilam (Afrique pour la Lutte Antimines) ifite icyicaro mu Mujyi wa Kisangani mu Ntara ya Tshopo. Yashinzwe muri Werurwe 2008 kugira ngo ijye itanga ubufasha mu gutegura ibisasu bitabye mu butaka.
Buri gitondo mbere y’uko imirimo itangira, abashinzwe gutunganya ikibuga cy’indege cya Goma bazajya bahabwa amabwiriza ajyanye n’igice bagiye gukoreramo, mu kubungabunga umutekano wabo.
Kuri iki kibuga cy’indege kandi hashyizwe imbangukiragutabara izajya yifashishwa mu gihe hari umukozi wagira ikibazo cy’ubuzima. Abakozi ba Loni bashaka ko byose bikorwa hubahirizwa amabwiriza mpuzamahanga y’umutekano.
Ikibuga cy’Indege cya Goma cyafunzwe muri Mutarama 2025, mbere y’uko abarwanyi ba AFC/M23 bagifata. Ingabo za Leta ya RDC zasize zangije bimwe mu bice by’ingenzi byacyo birimo n’umunara uyoborerwamo indege.
Umuryango mpuzamahanga ugaragaza ko kugira ngo imirimo y’ubutabazi igende neza gikwiye gufungurwa, ariko AFC/M23 yagaragaje kenshi ko umutekano wacyo utizewe kuko ingabo za Leta zishobora kuba zaratezemo ibisasu.
