Fabos Fali 
Imfungwa 4400 zatorotse Gereza ya Munzenze iherereye mu mujyi wa Goma, intara ya Kivu y’Amajyaruguru muri Repubulika Iharanira Demokarasi ya Congo.
Video yakwirakwiye ku mbuga nkoranyambaga igaragaza imfungwa nyinshi zirukanka, zisakuza. Kuri iyi gereza humvikana urusaku rw’amasasu menshi, hanagaragara umwotsi mwinshi w’aho zasize zitwitse.
Izi mfungwa zatorotse nyuma y’aho umutwe witwaje intwaro wa M23 utangaje ko wafashe uyu mujyi mu rukerera rwo kuri uyu wa 27 Mutarama 2025.
Izi mfungwa zitorotse mu gihe abarwanyi ba M23 bakomeje guhanganira n’abasirikare ba RDC, FDLR n’ihuriro Wazalendo mu bice bimwe na bimwe byo mu mujyi wa Goma.
Ingabo nyinshi za RDC zarambitse intwaro, zimwe zihungira mu kigo cy’ingabo ziri mu butumwa bw’amahoro bw’Umuryango w’Abibumbye (MONUSCO), izindi zihungira mu mujyi wa Bukavu zinyuze mu Kiyaga cya Kivu, izindi zihungira mu Rwanda.
Gusa haracyari ingabo nke z’iki gihugu, abarwanyi ba FDLR na Wazalendo bakomeje guhanganira na M23 muri ibi bice, bagamije kwisubiza uyu mujyi. Havugwa kandi ibikorwa by’ubusahuzi ku ruhande rw’iri huriro ry’ingabo za Leta ya RDC.
Gereza ya Munzenze ifungiwemo benshi bakurikiranyweho ibyaha byakorewe mu burasirazuba bwa RDC, barimo n’abafatiwe mu bikorwa bitandukanye bihungabanya umutekano wo muri Goma
Fabos Fali 
