Imfungwa zirenga 55 zatorotse Gereza Nkuru ya Walungu muri RD Congo, ku mugoroba wo ku wa 12 Mutarama 2024, nyuma yo gusindisha umupolisi wari ku burinzi.  Ibi byateye ubwoba abaturage bo mu gace ka Walungu bitewe n’uko zikihishahisha, basaba inzego z’ubuyobozi gushyira imbaraga mu gushakisha abatorotse bose.

Perezida wa sosiyete sivile, Christian Ziganira, yagize ati “Dufite ubwoba bwinshi kuko mu batorotse harimo abantu bashobora gukora ubugizi bwa nabi, gusahura n’ubujura. Ni yo mpamvu abaturage bafite ubwoba bakaba basaba ubuyobozi gukora ibishoboka mu kugarura abatorotse.”

Raporo z’imiryango iharanira uburenganzira bwa muntu zigaragaza ko gereza zo mu Ntara ya Kivu y’Epfo zirushaho kwangirika ku buryo atari ahantu hakwiye gufungirwa abantu. ndetse Sosiyete sivile muri ako gace yatangaje ko abasaza n’abakecuru ari bo batashoboye gutoroka kuko abatorotse banyuze mu gisenge cya gereza.

Icyakora bivugwa ko gereza zo muri ako gace zitameze neza, urugero ni uko muri uku kwezi wa Mutarama, abantu bane bamaze gupfira muri gereza ya Kamitunga kubera imiterere mibi y’ahantu bari bafungiye, ku buryo hatagize igikorwa hapfa n’abandi benshi.

Bikunze kubaho ko muri iki gihugu cya RD Congo imfungwa zikunda gutoroka amagereza, nko muri Gicurasi 2017, abarenga 1700 batorotse gereza ya Kinshasa nyuma y’igitero cy’inyeshyamba cyagabwe kuri imwe mu magereza Manini y’igihugu. Muri Kanama 2022, abarenga 800 batorotse gereza ya Butembo ndetse muri uko kwezi abandi 60 batoroka iya Kasaï.