Indwara ya Coronavirus yihinduranyije ikaba izwi nka JN.1, ikomeje gukwirakwira muri Leta Zunze Ubumwe za Amerika nk’uko byagaragajwe n’Ikigo cy’iyi Leta gishinzwe kugenzura no kurwanya indwara, CDC. Iki kigo cyatangaje ko abandura Coronavirus bashya abari kuba bafite JN.1 bangana na 20%, ndetse iyi mibare ikaba iri kuzamuka byihusekuko yamaze kwiganza mu Majyaruguru y’Iburasirazuba bwa Amerika.

Coronavirus yakunze kurangwa no kwihinduranya ku buryo bwihuse cyane, ku buryo abahanga muri siyansi n’inkingo bagaragaje ko bitoroshye gukora urukingo ruhangana nayo burundu kuko ikunda kwihinduranya. Ubwoko bwashegeshe isi cyane kurusha ubundi ni Omicron, nubwo butagihari ku rwego rwo hejuru abahanga bagaragaza ko BA.2.86 igihari ndetse ikomeje gukwirakwira mu bihugu bitandukanye.

Ikigo cya CDC kigaragaza ko JN.1 yo yaje ndetse iri gukwirakwira ku buryo budasanzwe aho abayanduye bikubye kabiri mu Ugushyingo n’Ukuboza 2023. Abahanga mu gutahura Coronavirus zihinduranyije, bagaragaza ko mu byumweru biko JN.1 ishobora kugera mu bihugu byinshi ku Isi.

Ishami ry’Umuryango w’Abibumbye ryita ku buzima OMS, ku wa 19 Ukuboza 2023, yagaragaje ko ari imwe mu zigomba kwitabwaho bijyanye n’uko iri gukwirakwira. N’ubwo iki cyorezo gikomeje gukwirakwira OMS ihumuriza abantu ko nubwo ikomeje gukwirakwira, ibyago ishobora guteza ku buzima bw’abatugare bikiri hasi.

Kugeza uyu munsi iyi ndwara ikomeje gutumbagira mu bihugu birimo Denmark, Espagne, u Bubiligi, u Bufaransa ndetse n’u Buholandi ahandi ni muri Canada no mu bihugu byo muri Aziya nk’uko byatangajwe n’ikinyamakuru CNN.