Fabrice Nahimana Imirwano ikomeye kuri uyu wa Gatandatu ushize yahuje abarwanyi ba AFC / M23 n’ihuriro ry’inyeshyamba za Wazalendo zifatanyije na FARDC, mu midugudu myinshi yo muri Teritwari ya Masisi mu Ntara ya Kivu y’Amajyaruguru mu burengerazuba bwa Repubulika ya Demokarasi ya Congo.
Nk’uko amakuru menshi abivuga, imirwano yari yiganje i Ndete, mu gace ka Muhanga muri Gurupoma ya Buabo. Indi mirwano yavuzwe i Mashaki (Gurupoma ya Nyamaboko I) na Lukole (Gurupoma ya Banyungu).
Nk’uko amakuru aturuka muri ako gace agera kuri mediacobgo.net avuga, ngo guhera saa kumi n’imwe za mu gitondo, humvikanye urusaku rww’intwaro ziremereye n’izoroheje muri iyi midugudu itatu yo mu Murenge wa Osso-Banyungu.
Biravugwa ko inyeshyamba za Wazalendo zagabye ibitero icyarimwe bagerageza kwigarurira utwo duce, duherutse kwigarurirwa n’inyeshyamba za AFC / M23 muri iki cyumweru.
Iyi mirwano mishya yabaye nyuma y’indi mirwano ikaze, kuwa Gatanu, yabereye i Kinyumba no mu nkengero za Nyabiondo (itsinda rya Banyungu), ndetse n’i Buguri, hafi ya Lushebere (Gurupoma ya Buabo), aho byavugwaga ko hari ibirindiro bya AFC / M23 byatwitswe na Wazalendo.
Amakuru aturuka muri ako gace kandi avuga ko hari igitero cyo mu kirere cyagabwe na drone ya gisirikare, bivugwa ko cyibasiye imodoka ya AFC / M23 ku mugoroba wo ku wa Gatanu ku muhanda wa Mushaki-Rubaya. Nta mibare y’abapfuye yatangajwe.
