Nyuma y’uko muri Kamena 2023 ubuyobozi bw’irushanwa rya Miss World bwari bwatangaje ko kunshuro yaryo ya 71 rigiye kongera kuba, Miss Rwanda 2022 Nshuti Divine Muheto akaba yari mu bakobwa bagombaga kwitabira, kuri ubu uyu mukobwa ntakiri ku rutonde rw’abazitabira iri rushanwa.

Iri rushanwa ku nshuri yaryo ya 71 rizabera mu gihugu cy’u Buhinde ariko Miss Muheto yakuwe ku rutonde rw’abazitabira. Amakuru avuga ko uyu mukobwa yagombaga kwitabira iri rushanwa abifashijwemo n’imwe muri sosiyete zisanzwe zitegura amarushanwa y’ubwiza mu Rwanda, ariko nanone Rwanda Inspiration Backup yagombaga kumufasha.

Iyi Rwanda Inspiration Backup isanzwe ari iya Ishimwe Dieudonne aka Prince kid yahagaritswe kubera ibibazo bye byo kuba akurikiranweho ruswa ishingiye ku gitsina byavuzwe ko yagiye yaka abakobwa bitabiriye miss Rwanda mu bihe bitandukanye.

Ngo hari indi sosiyete itegura amarushanwa y’ubwiza yari igiye guhabwa uburenganzira bwo kohereza umukobwa muri miss World ari nayo yari kohereza Miss Muheto, ariko ntibyakunze kubera ko itabashije kumvikana na we byatumye ihita inareka gukomeza kuvugana n’abategura miss World.