Fabrice Nahimana Inteko Ishinga Amategeko ya Repubulika Iharanira Demokarasi yohereje itsinda mu Butaliyani kugira ngo risuzume ibikubiye mu masezerano ubutegetsi bw’iki gihugu bwagiranye n’ikipe y’umupira w’amaguru ya AC Milan.
Iri tsinda rigizwe n’abadepite batanu ryoherejwe na Perezida w’Inteko ya RDC, Vital Kamerhe, tariki ya 1 Nyakanga 2025, mu gihe hari impungenge ko iyi kipe yahawe amafaranga y’umurengera kugira ngo yamamaze ubukerarugendo bw’iki gihugu.
Inyandiko yohereza aba badepite yanditseho iti “Impamvu: kwitabira inama yo gusuzuma imiterere y’ubufatanye bwa RDC na AC Milan.”
Depite Serge Chembo Nkonde, Patrick Munyomo Basilwango, Dhedhe Mupasa Lukobo, Marie Thérèse Isombi Bazego na Guy Mafuta Kabongo basabwe kumara mu Butaliyani icyumweru, hanyuma bagategura raporo y’ubusesenguzi izashyikirizwa Inteko Rusange.
Biteganyijwe ko mu gihe byazaba ngombwa, iri tsinda rizasaba ko hashyirwaho Komisiyo yihariye izaba ishinzwe gukora iperereza kuri aya masezerano.
Muri Kamena 2025 ni bwo amasezerano ya RDC na AC Milan yatangajwe. Iki gihugu cyemeye kujya cyishyura iyi kipe miliyoni 14 z’Amayero ku buri mwaka w’imikino, guhera tariki ya 1 Nyakanga 2026.
AS Monaco yo mu Bufaransa na FC Barcelone yo muri Espgagne na zo ziherutse kugirana na RDC amasezerano yo kwamamaza ubukerarugendo bwayo.
