Izi nyeshyamba ziri mu byiciro bibiri, icya mbere kigizwe n’inyeshyamba ziyobowe n’umutwe wa Hayat Tahrir al-Sham (HTS) waturutse mu Majyaruguru y’igihugu. Uyu mutwe ugizwe n’abahoze ari abarwanyi ba Al-Queda, uyoborwa na Abu Mohammad al-Jolani.

Uyu mutwe uri kurwana uturutse mu majyaruguru, ni na wo ufite imbaraga, aho watangiriye intambara yawo mu Mujyi wa Idrib, ukomereza mu Mujyi wa Hama, magingo aya uri mu nkengero z’Umujyi wa Homs ufatwa nk’uwa nyuma ukomeye ukoreshwa mu kurinda Umurwa Mukuru wa Syria, Damascus.

Gusa ntabwo HTS ari wo mutwe wonyine uri kurwana, kuko hari n’indi mitwe iri kurwana cyane cyane mu majyepfo y’igihugu.

Iyi mitwe yafashe Umujyi wa Daraa na Suwayda, aha hakagira umwihariko w’uko ari ho hatangiriye impinduramatwara zatangije imyigaragambyo karundura mu 2011 yari igamije gukuraho Perezida Bashir al-Assad, iyo myigaragambyo ikaba ari nayo yavuyemo intambara ikomeje uyu munsi muri Syria.

Amakuru avuga ko inyeshyamba zamaze kugota umujyi wa Homs, aho ziramutse ziwufashe, zaba ziciyemo kabiri ibice bigenzurwa na Leta ya Bashir al-Assad.

Uyu mujyi kandi ni wo ukora nk’ikiraro kinyuzwamo ibicuruzwa biturutse ku cyambu byerekeza i Damascus, ku buryo kuwufata byashyira ubuzima bw’abaturage mu kaga.

Benshi mu bawutuye ni abashyigikiye Perezida Bashir al-Assad, batangiye guhunga batinya kowaza kugwa mu maboko y’inyeshyamba, zishobora kubagirira nabi zibahora kuba barafashije Bashir al-Assad.

Homs iramutse ifashwe, byaba bisobanuye ko igisirikare cya Syria kiri kurushaho kujya mu byago byo kunanirwa kurinda ubutegetsi bwa Assad, gusa cyatanze icyizere ko kigiye gushyira imbaraga mu kurinda uyu mujyi, uretse ko benshi bemeza ko ubushobozi bwacyo buri hasi cyane, ahanini bitewe n’uko izi ngabo zatunguwe, mu gihe zitagira ibikoresho byazifasha gukomeza kurwana, zikaba zidahembwa bikwiriye ndetse nta n’imyitozo ifatika zifite.