Mu mujyi wa Qardaha mu Majyaruguru ya Syria inyeshyamba zahiritse ubutegetsi zashenye imva ya Hafez al-Assad se wa Perezida wa Bashar al-Assad.

Izi nyeshyamba zanamanuye amashusho y’ibibumbano hamwe n’ibyapa biriho uyu Hafez n’umuhungu we Bashar mu bice bitandukanye by’igihugu.

Hagati aho, mubyara wa Bashar Assad witwa Assad Suleiman Hilal al-Assad na we yiciwe ku mugaragaro amanitswe imbere y’imbaga.

Ni videwo yacicikanye ku mbuga nkoranyambaga aho wabonaga abantu bishimiye iki gikorwa bagaragaza ko ubutegetsi bw’abo mu muryango wa Bashar al-Assad bwarangiye.

Inyeshyamba ziyobowe n’umutwe wa Hayat Tahrir al-Sham (HTS) ugendera ku mahame y’idini ya Isilamu zakwiriye muri Syria mu gitero gitunguranye cyahiritse ubutegetsi bwa Assad yari imaze imyaka 54.

Bashar n’umuryango we ubu bari mu Burusiya abo bahungiye.

Nyuma yo guhirika ubutegetsi bwa Perezida Bashar al-Assad, inyeshyamba zagennye Mohammed al-Bashir ngo abe Minisitiri w’Intebe w’Agateganyo.

Ni umwanzuro wavuye mu nama Umuyobozi w’inyeshyamba Abu Mohammad al-Jolani yagiranye na Mohammed Jalali wari Minisitiri w’Intebe ku bwa Assad ndetse na Visi Perezida Faisal Mekdad.

Bashir wagizwe Minisitiri w’Intebe, yari asanzwe ari Umuyobozi w’agace ka Idlib kari mu Majyaruguru kari kari mu maboko y’inyeshyamba za HTS guhera muri Mutarama uyu mwaka.