Fabrice Nahimana Inzego z’umutekano z’u Rwanda n’u Burundi, mu mpera z’icyumweru gishize zarahuye ziganira uko zacubya umwuka mubi n’ubushyamirane bwarimo bututumba hagati y’ibihugu byombi.
Amakuru y’iyo nama yarimo n’abakuriye inzego z’ubutasi mu bihugu byombi, yemejwe na Minisitiri w’Ububanyi n’Amahanga, Amb. Olivier Nduhungirehe, mu kiganiro yagiranye na Televiziyo ya France 24.
Yagize ati: “Ku bijyanye n’u Burundi, muri iyi ‘weekend’ hari inama yabaye hagati y’inzego z’umutekano z’ibihugu byombi mu rwego rwo kuganira ku gucubya ubushyamirane.””
Minisitiri Nduhungirehe yunzemo ko mu gihe inama zimeze nk’iyabaye zaba zikomeje ubushyamirane mu karere bwagabanuka, ndetse hakabaho kubyutsa amasezerano y’amahoro atandukanye.
Inama y’inzego z’umutekano z’u Burundi n’u Rwanda yabaye, mu gihe umwuka mubi ukifashe nabi hagati y’ibi bihugu by’abaturanyi.
Ni nyuma y’imirwano yatangiye mu byumweru bishize yasize ku wa 9 Ukuboza inyeshyamba za AFC/M23 zigaruriye umujyi wa Uvira, mbere yo gutangira kuwuvanamo ingabo ejo ku wa Gatatu.
Muri iyo mirwano u Burundi bwashinje u Rwanda kurasa ku butaka bwabwo bukoresheje intwaro ziremereye, ibirego u Rwanda rwateye utwatsi ahubwo rukavuga ko u Burundi ari bwo bwarashe ku butaka bwarwo, mu Bugarama.
Kuva Uvira yafatwa kandi u Burundi biciye mu badipolomate babwo bakunze bwakunze gukangisha u Rwanda ko bashobora kwisanga mu ntambara yeruye, ndetse mu nama y’akanama ka Loni gashinzwe amahoro n’umutekano ku Isi Gitega yasabye ko u Rwanda rwafatirwa ibihano by’ubukungu, ndetse rukabuzwa kugura intwaro.
