Ku wa 29 Ukuboza 2024 ni bwo ijonjora rya kabiri rya CHAN 2024 ryashyizweho akadomo, risiga hamenyekanye ibihugu 17 muri 19 bizakina iri rushanwa rizabera muri Uganda, Tanzania na Kenya kuva tariki ya 1 kugeza ku ya 28 Gashyantare 2025.

U Rwanda ni cyo gihugu cyagize umusaruro mwiza muri iri jonjora ariko kitahise kibona itike kubera amabwiriza yari yarashyizweho mbere y’uko imikino itangira.

Mu Ukwakira, ubwo habaga tombola y’amajonjora ya CHAN 2024, CAF yagaragaje ko buri karere kayo (Zone) kazahagararirwa n’ibihugu bitatu, uretse aka CECAFA kazongezwa umwanya umwe nyuma y’uko ibindi bihugu bitatu ari byo bizakira.

Ibi bivuze ko ibihugu 11 byo muri CECAFA byitabiriye amajonjora abiri yakinwe, byari bihataniye umwanya umwe, byarangiye wegukanywe na Sudani yagize amanota atandatu harebwe umusaruro w’imikino ibiri ya nyuma

.

Ikindi gihugu cyari gukurikiraho icyo gihe, cyari kuba Uganda ariko yari isanganywe itike mu gihe kandi hari u Rwanda rwasezereye Sudani y’Epfo ku gitego cyo hanze nyuma yo gutsinda umukino umwe, rugatsindwa undi.

Abavuga ko u Rwanda rwakina CHAN 2024 babikura he?

Ubwo aya majonjora yari arangiye, ugendeye ku musaruro wo mu kibuga, birumvikana ko u Rwanda rwari runaniwe kubona itike imwe yari isigaye muri CECAFA, yegukanywe na Sudani.

Nubwo bimeze gutyo ariko, amahirwe y’u Rwanda ashingiye ku kuba hari ibihugu bibiri byari gukina CHAN 2024 byikuye mu irushanwa kandi bifite itike. Ibyo ni Libya na Tunisia byo muri Afurika y’Amajyaruguru.

Aha ni ho benshi bahera bavuga ko mu gihe CAF yaba igiye kwemeza ibihugu bibiri bibisimbura, yahita ihera ku Rwanda rwagize umusaruro mwiza kurusha ibindi bihugu byose byakinnye amajonjora ntibibone itike.

Urebye mu tundi turere twose (Zone), nta yindi kipe yabuze itike ifite umusaruro nk’uw’u Rwanda na Sudani y’Epfo.

Ibyo si ko CAF ibibona ndetse Amavubi ashobora kuguma mu rugo

Mbere y’uko haba tombola, hari ibihugu 15 byanze kwitabira amajonjora y’iri rushanwa, birimo ibikomeye nka Misiri na Afurika y’Epfo kubera ko ingengabihe ya CHAN 2024 yagiye hanze za shampiyona zabyo zaratangiye.

Hashize iminsi 11 CAF imenye ibihugu 17 bizakina iri rushanwa ndetse ni cyo gihe gishize izi ko hari indi myanya ibiri isigaye, ariko yararuciye irarumira.

Ku ruhande rw’u Rwanda, ubuyobozi bwa FERWAFA bwabwiye IGIHE ko bwagerageje kubaza muri CAF ibijyanye no gukina CHAN ariko na n’ubu amaso yaheze mu kirere.

Ni mu gihe ku rundi ruhande, ikinyamakuru DZfoot cyo muri Algérie cyanditse ko CAF iheruka kwegera Ishyirahamwe rya Ruhago muri icyo gihugu irisaba ko ikipe yacyo yazitabira CHAN 2024.

Bivugwa kandi ko mu gihe CAF itegereje igisubizo cya Algérie, yanegereye Misiri yo muri UNAF kugira ngo akarere ka Afurika y’Amajyaruguru katazaba gafite ikipe imwe gusa ya Maroc kandi kakagombye kuba gafite amakipe atatu muri CHAN 2024.

Uretse ibyo kandi, ikinyamakuru SABC Sport cyo muri Afurika y’Epfo cyanditse ko Bafana Bafana na yo ishobora kwitabira iri rushanwa yari yavuze ko itakandagiramo, ariko kuri iyi nshuro bikunze ikaba yakwitwaza ikipe y’abato.

Ikinyamakuru ShootAfrica cyanditse ko hashobora gutegurwa irushanwa ry’ibihugu birindwi, bikavamo bibiri byuzuza imyanya 19 y’amakipe azakina CHAN 2024.

Ibihugu byakina iryo rushanwa ni Afurika y’Epfo, Algérie, Misiri, Ibirwa bya Comores, Malawi, Gambia na Gabon.

Algérie, Misiri na Afurika y’Epfo bikaba bishobora kwifashisha abakinnyi batarengeje imyaka 20 mu kwitegura Igikombe cya Afurika kizabera muri Côte d’Ivoire muri Mata, mu gihe za shampiyona zizakomeza.

Indi mpamvu isunikira bimwe muri ibi bihugu kongera gutekereza iri rushanwa ni uko ibihembo byaryo byongereweho 32% harimo 75% ku ikipe izaritwara.

Nubwo bimeze gutyo, Impuzamashyirahamwe ya Ruhago muri Afurika iheruka gutangaza ko tombola ya CHAN izabera i Nairobi ku wa 15 Mutarama 2025.

CAF ngo ibona ko gukina iri rushanwa ritarimo Afurika y’Epfo na bimwe mu bihugu byo muri Afurika y’Amajyaruguru bitatuma ricuruza ngo rinakurure ibigo by’itangazamakuru bishaka kuryerekana.

Ibihugu 17 byamaze kubona itike ya CHAN 2024:

CECAFA: Kenya, Uganda, Tanzania na Sudani.

WAFU A: Guineé, Sénégal na Mauritania.

WAFU B: Niger, Burkina Faso na Nigeria.

Afurika yo Hagati: Congo, Repubulika Iharanira Demokarasi ya Congo na Repubulika ya Centrafrique.

COSAFA: Angola, Zambia na Madagascar.

Afurika y’Amajyaruguru: Maroc.