Umusore witwa Kwibuka Emmanel w’imyaka 20 y’amavuko wo mu Mudugudu wa Nyagacyamu, mu Kagari ka Muganza, Umurenge wa Runda, mu Karere ka Kamonyi, mu gitondo cyo ku wa Mbere tariki 08 Mutarama 2024 hamenyekanye inkuru y’urupfu rwe aho abagizi ba nabi bamwishe bakamusiga mu nzira.

Amakuru avuga ko umurambo w’uyu musore wasanzwe mu muhanda yishwe atewe icyuma ndetse abenshi bemeza ko yari umusore witonda. Umwe mu baturage yabwiye BTN ati “Uyu musore yitondaga cyane, umuhungu yamanutse agiye kuvoma mu gitondo, ni icyuma bamuteye.”

Ise wa nyakwigendera, Namabajimana Francois, avuga ko yavuye mu rugo agiye kuzana bateri ye yasize acaginze ku muhanda, barategereza ariko ntiyagaruka, nyuma amakuru abageraho nibwo bamenye ko yitabye Imana.

Umunyamabanga Nshingwabikorwa w’Umurenge wa Runda, Ndayisaba Egide yavuze ko bamenye amakuru y’uru rupfu ndetse batangiye gukora iperereza ngo hamenyekane uwabigizemo uruhare. Ati “Ayo makuru ni impamo, natwe twayabwiwe n’abaturanyi baho, hafi yaho umurambo w’uwo mwana wasanzwe, mu Kagari ka Muganza.”

Gitifu Ndayisaba yavuze ko kugeza ubu hatangijwe iperereza ngo bamenye uwo ari we wese wabigizemo uruhare, kandi abahanga mu gupima ibimenyetso bya gihanga bahageze barakomeza bapime tumenye uko byagenze. Yakomeje avuga ko bagiye gukaza ingamba z’umutekano mu rwego rwo kurwanya imfu za hato na hato no kurinda umutekano w’abaturage.