Urukiko Rwisumbuye rwa Nyarugenge rwongeye gusubika urubanza Kazungu Denis aregwamo n’Ubushinjacyaha ku nshuro ya gatatu kubera Inama y’abakozi b’inkiko yabaye kuri uyu wa Gatanu tariki ya 2 Gashyantare 2024.

Uru rubanza rwaherukaga gusubikwa ku wa 12 Mutarama ku busabe bw’umwunganizi wa Kazungu Denis wasabaga guhabwa umwanya wo kubanza gutegura neza dosiye, bituma rwimurirwa ku wa 9 Gashyantare 2024 saa tatu za mu Gitondo.

Urukiko Rwisumbuye rwa Nyarugenge rwongeye gusubika ku nshuro ya kabiri urubanza ruregwamo Kazungu Denis ukurikiranyweho ibyaha birimo ubwicanyi, byari biteganyijwe ko urubanza rwe rusomwa kuri uyu wa Gatanu tariki ya 12 Mutarama 2024, rwasubitswe biturutse ku nzitizi zatanzwe n’abunganira uregwa z’uko batinze kubona dosiye.

Kazungu Denis akurikiranyweho ibyaha birimo ubwicanyi bw’abantu basaga 14 yarezwe n’urundi rubanza rwo gusambanya umugore ku ngufu. Uru rubanza rwaregewe Urukiko Rwisumbuye rwa Nyarugenge mu Ukwakira 2023 ndetse umwe mu bafashwe ku ngufu na Kazungu yaramureze anasaba indishyi muri uru rubanza.