Fabrice Nahimana Ubutegetsi bwa Repubulika Iharanira Demokarasi ya Congo buhamya ko ihuriro AFC/M23 ryakoresheje indege zitagira abapilote ’drones’ nyinshi mu mirwano yabereye muri teritwari ya Walungu mu Ntara ya Kivu y’Amajyepfo.
Imirwano ikomeye hagati ya AFC/M23 n’ihuriro ry’ingabo za RDC na Wazalendo muri Walungu yatangiye tariki ya 7 Kanama 2025. Ku munsi wakurikiyeho, AFC/M23 yafashe agace ka Kaniola, Mulamba, Muzinzi na Ciruko.
Umuvugizi w’ibikorwa by’igisirikare cya RDC muri Kivu y’Amajyepfo, S. Lt Reagan Mbuyi Kalonji, yari yahakanye aya makuru, asobanura ko ari ibinyoma byahimbwe na AFC/M23 igamije guteza umwiryane mu basirikare.
S. Lt Mbuyi ukorera mu biro by’agateganyo muri Uvira, yagize ati “Ingabo za Leta zisabye abatuye mu misozi miremire n’imigufi muri Uvira, Fizi na Mwenga gukomeza kuzizera kuko zirinda ubusugire bw’igihugu zitizigama.”
Gusa Umuvugizi w’intara ya Kivu y’Amajyepfo ku ruhande rwa Leta, Didier Kabi Bashizi, yemeje ko ingabo za RDC na Wazalendo byavuye muri utu duce mu rwego rwo kwirinda ko amaraso ameneka, kuko AFC/M23 yakoresheje ’drones’ n’ibifaru byinshi.
Mu kiganiro Kabi yagiranye na radiyo mpuzamahanga y’Abafaransa, RFI, yasobanuye ko mu duce AFC/M23 iri kugenzura harimo na Muzinzi ndetse na Ciruko, ati “Uduce turimo Kaniola, Muzinzi, Ciruko n’igice cya Mulamba turi kugenzurwa n’inyeshyamba.”
Ku wa 10 Kanama, ingabo za RDC na Wazalendo byateye ibirindiro bya AFC/M23 muri Walungu, bigamije kwisubiza utu duce byari byambuwe ariko ntacyo byatanze. Hari abaturage bahungiye aho bizeye umutekano, abandi bafata icyemezo cyo kuguma mu ngo.
Mu ntara ya Kivu y’Amajyaruguru, cyane cyane muri teritwari ya Rutshuru na Masisi, na ho hamaze iminsi habera imirwano ikomeye ya AFC/M23 n’imitwe yitwaje intwaro irimo FDLR n’indi bihuje ingengabitekerezo irimo Nyatura CMC ndetse na APCLS.
Hari amakuru avuga ko tariki ya 7 Kanama AFC/M23 yasabye abaturage kuva mu bice bimwe na bimwe byo muri gurupoma ya Butanda, sheferi ya Bwito muri teritwari ya Rutshuru mu minsi itanu, ibamenyesha ko hashobora kubera imirwano ikomeye.
Mu kiganiro n’abanyamakuru cyabaye tariki ya 7 Kanama, Umuyobozi wungirije wa AFC/M23, Bertrand Bisimwa, yagaragaje ko Leta ya RDC ibinyujije mu ngabo zayo na Wazalendo, ikomeje gushotora abarwanyi babo.
Bisimwa yagize ati “Kinshasa igomba guhagarika imikino. Turamutse dufashe icyemezo cyo gusubiza ibi bitero, ntibiba bikwiye kuvugwa ko twarenze ku ihagarikwa ry’imirwano. Kwihangana bigira aho bigarukira. Kinshasa nikomeza iyi mikino, tuzirwanaho kandi bazi uko dushobora kwirwanaho.”
Imirwano ikomeje impande n’impande mu gihe tariki ya 19 Nyakanga, Leta ya RDC na AFC/M23 byashyizeho amahame aganisha ku masezerano y’amahoro, arimo ingingo isaba ko imirwano ihagarara burundu.
Byari bitanyijwe ko Leta ya RDC na AFC/M23 bizatangira ibiganiro by’amahoro bitarenze tariki ya 8 Kanama, bibifashijwemo na Qatar, ariko ntibiratangira, n’igihe byimuriwe ntikiramenyekana.
